Qashqadaryo viloyatining Qarshi shahrida 388,8 mln so‘mlik, jami 451,4 tonna imtiyozli ko‘mir qimmat narxlarda sotib yuborilgani aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ta’kidlanishicha, departamentning Qashqadaryo viloyati boshqarmasi tomonidan o‘tkazilgan tezkor tadbirda fuqaro R.K. “Ko‘mir ta’minot” MCHJning Qarshi shahri ko‘mir ombori mas’ul shaxslari bilan o‘zaro til biriktirib, kuz-qish mavsumida imtiyozli narxlarda aholiga tarqatilishi lozim bo‘lgan 70 tonna ko‘mirni fuqaro R.X.ga 4 000 AQSH dollariga sotishga kelishib, shundan dastlab 4 tonna ko‘mirni ombordan olib chiqib kelgan vaqtida ashyoviy dalillar bilan ushlangan.
Shuningdek, tergovga qadar tekshiruv jarayonida ushbu ko‘mir ombori mas’ul shaxslari umumiy bahosi 388,8 mln so‘mlik jami 451,4 tonna imtiyozli ko‘mirni qimmat narxlarda sotib yuborgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Namangan va Xorazm viloyatlari hamda Qoraqalpog‘iston Respublikasida ko‘mir ta’minotidagi talon-torojliklar fosh etilgani, Surxondaryoda esa 1,4 tonna ko‘mir talon-toroj qilingani aniqlangani xabar qilingandi.
Izoh (0)