Эроннинг Жанубий Хуросон провинциясидаги кўмир шахтасида метан портлаши оқибатида камида 51 киши ҳалок бўлди, 20 киши жароҳатланди. Бу ҳақда IRNA хабар берди.
Портлаш 21 сентябрь соат 21:00 атрофида Маdanjoo компанияси томонидан бошқариладиган шахтанинг Б ва C блокида юз берган. Фожиа вақтида ичкарида 69 киши бўлган.
“Мамлакат кўмирининг 76 фоизи шу ҳудуддан олинади ва ҳудудда 8-10 га яқин йирик компаниялар, жумладан, Мadanjoo компанияси ишлайди”, дейди Жанубий Хуросон провинцияси губернатори Али Акбар Раҳимий.
Б блокда қутқарув операцияси якунланган. Блокдаги 47 нафар ишчидан 30 нафари ҳалок бўлган, 17 нафари жароҳатланган. C блокда қутқарув ишлари бошланган. Операция тахминан уч-тўрт соат давом этиши кутилмоқда.
Жанубий Хуросон провинциясида уч кунлик мотам эълон қилинган. Эрон президенти Масъуд Пезешкиён ҳалок бўлганларнинг оила аъзоларига ҳамдардлик билдирган.
“Мен вазирлар билан гаплашдим ва биз чоралар кўриш учун барча имкониятларни ишга соламиз”, деган у.
Изоҳ (0)