Қашқадарё вилоятининг Қарши шаҳрида 388,8 млн сўмлик, жами 451,4 тонна имтиёзли кўмир қиммат нархларда сотиб юборилгани аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Таъкидланишича, департаментнинг Қашқадарё вилояти бошқармаси томонидан ўтказилган тезкор тадбирда фуқаро Р.К. “Кўмир таъминот” МЧЖнинг Қарши шаҳри кўмир омбори масъул шахслари билан ўзаро тил бириктириб, куз-қиш мавсумида имтиёзли нархларда аҳолига тарқатилиши лозим бўлган 70 тонна кўмирни фуқаро Р.Х.га 4 000 АҚШ долларига сотишга келишиб, шундан дастлаб 4 тонна кўмирни омбордан олиб чиқиб келган вақтида ашёвий далиллар билан ушланган.
Шунингдек, терговга қадар текширув жараёнида ушбу кўмир омбори масъул шахслари умумий баҳоси 388,8 млн сўмлик жами 451,4 тонна имтиёзли кўмирни қиммат нархларда сотиб юборгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Наманган ва Хоразм вилоятлари ҳамда Қорақалпоғистон Республикасида кўмир таъминотидаги талон-торожликлар фош этилгани, Сурхондарёда эса 1,4 тонна кўмир талон-торож қилингани аниқлангани хабар қилинганди.
Изоҳ (0)