Farg‘ona shahar hokimi Vosiljon Nazarov o‘tgan yilning 25-iyul kuni sobiq hokim Mirzohid Ubaydullayev tomonidan 2021-yilda imzolangan qarorni o‘zgartirishga oid qarorni qabul qilgan. Biroq hokim qarorni qabul qilish jarayonida mavjud qonun talablariga rioya etmagan.
Qarorga qanday o‘zgartirish kiritilgan?
“Farg‘ona shahar hokimining 2021-yil 26-apreldagi 301-sonli qaroriga o‘zgartirish va qo‘shimcha kiritish to‘g‘risida”gi qarorda sobiq hokim imzolagan qarorning 2-bandida mavjud “loyihaga moslangan holda 7 qavatli birinchi va ikkinchi qavatlarida savdo va maishiy xizmat ko‘rsatish kompleksi, qolgan qavatlarida turar joy binosi qurish” so‘zlari “loyihaga moslangan holda yo‘l bo‘yidagi 9 qavatli binolar yerto‘la va birinchi qavatlarida savdo va maishiy xizmat ko‘rsatish kompleksi, qolgan qavatlarida turar joy binosi qurish sifatida hamda hududning ichki qismidagi 9 qavatli binolar yerto‘la va birinchi qavatlari ijtimoiy turar joy, qolgan qavatlarida turar joy binosi qurish” so‘zlariga o‘zgartirilgan. Ya’ni 7 qavatli binoni hokim qarori bilan 9 qavatli binoga aylantirishga ruxsat berilgan.
Qizig‘i shundaki, hokim qaror qabul qilish jarayonida faqatgina bir kishi — o‘zining ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi Farhod Mamajonov bilan kelishgan. Ammo maslahatchi hujjat qabul qilinishidan bir kun oldin mehnat ta’tiliga chiqqan edi.
Qonun buzilishi holatlari
Birinchidan, tegishli hujjatlarga asosan hokimlik tegishli tarkibiy bo‘linmalari hamda moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — iqtisodiy taraqqiyot va kambag‘allikni qisqartirish bo‘limi boshlig‘i bilan kelishishi shart bo‘lsa-da kelishmagan.
Balki, hokim boshqalar bilan kelishishni istamagan bo‘lishi ham mumkin.
Ikkinchidan, hokimlik bosh yuriskonsulti vazifasini vaqtincha bajarib turgan Adxamjon Rashidov tomonidan qaror yer masalalariga oid bo‘lsa-da, “Davlat mulkining ijara stavkasi” mazmunida yuridik xulosa berilgan.
Yuridik xulosa bergan Adhamjon Rashidov nega hokimlik devonxonasi mudiri sifatida kelishmaganligi qiziq.
Uchinchidan, Yer kodeksining 5-moddasida davlat hokimiyati organlarining yer munosabatlari sohasidagi qarorlari loyihalari Adliya vazirligining tegishli hududiy organlarida huquqiy ekspertizadan o‘tkazilishi shart ekanligi ko‘rsatilgan.
Afsuski, hujjat shahar adliya bo‘limidan huquqiy ekspertizadan o‘tkazilmasdan imi-jimida imzolangan.
To‘rtinchidan, prezidentning 2021-yil 8-iyundagi “Yer munosabatlarida tenglik va shaffoflikni ta’minlash, yerga bo‘lgan huquqlarni ishonchli himoya qilish va ularni bozor aktiviga aylantirish chora-tadbirlari to‘g‘risida”gi farmoniga asosan 2021-yil 1-avgustdan boshlab mahalliy davlat hokimiyati organlarining yer munosabatlariga oid qaror, farmoyish yoki boshqa turdagi hujjat qabul qilish, yer uchastkalariga bo‘lgan huquqlarni belgilash, e’tirof etish, o‘zgartirish huquqi bekor qilingan. Ammo Vosiljon Nazarov farmon talablarini buzgan.
Beshinchidan, hujjat qaror qismida kim tomonidan ijro qilinib, kim tomonidan nazorat qilinishi ko‘rsatilmagan, ammo ijroga qaratilib yuborilgan.
Adliya va prokuratura organlari e’tibor qilmagan bo‘lishi mumkin
Prezidentning 2022-yil 21-fevraldagi “Yer uchastkalaridan foydalanishda davlat nazorati samaradorligini oshirish chora-tadbirlari to‘g‘risida”gi qaroriga ko‘ra, prokuratura organlari zimmasiga yer uchastkalaridan oqilona foydalanish va ularni muhofaza qilish sohasida nazoratni yanada kuchaytirish vazifalari yuklatilgan.
Shuningdek, Vazirlar Mahkamasining 2021-yil 22-iyundagi 390-son qarori bilan tasdiqlangan nizomga asosan Adliya organlari “E-qaror” elektron tizimi orqali ishlab chiqish, kelishish, qabul qilish (chiqarish) ro‘yxatga olish va e’lon qilish jarayonlarining doimiy monitoringini olib borishi, natijalariga ko‘ra esa belgilangan muddatda munosabat bildirishi va mas’ul xodimlarga nisbatan ta’sir choralarini qo‘llashi lozim.
Hujjat qabul qilinganiga salkam bir yarim yil bo‘ldi. Bu orada adliya organlari o‘z vakolati doirasida monitoring o‘tkazmagani, hududiy prokuratura organlari ham e’tiborsiz qoldirgani qiziq.
“Daryo” mavzu yuzasidan mas’ullardan munosabat kutib qoladi.
Izoh (0)