Бухорода фуқаролар норозилигига сабаб бўлган 197 нафар мансабдор маъмурий жавобгарликка тортилди

Бухоро вилоятида аҳолига хизмат кўрсатишда қонунбузилиш ҳолатларини содир этиб, фуқароларнинг норозилигига сабаб бўлган 197 нафар давлат ташкилоти мансабдорлари маъмурий жавобгарликка тортилди. Бу ҳақда «Дарё»га Давлат хизматлари агентлиги Бухоро вилояти бошқармаси ахборот хизмати раҳбари Фаррух Тўрақулов хабар берди.

Маълум бўлишича, 2021 йилнинг шу даврига қадар давлат хизматларини кўрсатувчи ташкилот масъуллари томонидан жами 9090 та қонунбузиш ҳолати содир этилган. Шундан 3298 та ҳолатда давлат хизматларини кўрсатиш муддатлари бузилган бўлса, 277 та ҳолатда фуқаролардан ортиқча ҳужжатлар талаб қилинган. 766 маротаба қонунга хилоф равишда тўғридан-тўғри давлат хизматлари кўрсатилиб, 147 та мурожаат асоссиз рад этилган, 4594 та ҳолатда эса бошқа турдаги қонунбузилиш ҳолатларига йўл қўйилган.

«Аҳолига тезкор ва қулай давлат хизматлари кўрсатилиши талаб қилинаётган бир пайтда мутасадди давлат ташкилотлари раҳбарларининг қонунбузилиш ҳолатларини юзага келтириши одамлар норозилигини оширишигагина хизмат қилади. Улар сирасига банклар хизмати, соғлиқни сақлаш муассасалари, ер ресурслари ва давлат кадастри, қурилиш ва архитектура идоралари, ‘Ўзбекэнерго’, шунингдек, ДСЭНМ каби қатор ваколатли органлар киради. Ҳар бир давлат ташкилоти раҳбари ўз ишига эътибор ва масъулият билан ёндашмас экан, одамларнинг эртанги кунга ишончи қолмайди», — дейди Давлат хизматлари агентлиги вилоят бошқармаси бош мутахассиси Санжар Раҳматуллаев.

Қайд этилишича, 197 нафар мансабдорга нисбатан маъмурий баённома расмийлаштирилган ва улар маъмурий жавобгарликка тортилган. Шунингдек, 265 та огоҳнома ва 42 та тақдимнома киритилган. 8 нафар мансабдорга эса интизомий жазо чоралари қўлланилган.

Эслатиб ўтамиз, 30 октябрь куни Вазирлар Маҳкамаси президиумининг навбатдаги мажлиси бўлиб ўтганди. Унда бош вазир қабулхоналари фаолиятида масъулиятсизликка йўл қўйган раҳбарларга нисбатан интизомий жазо чораларини қўллаш тўғрисида қарор қабул қилинган. Улар орасида энергетика вазирининг биринчи ўринбосари Азим Аҳмадхўжаев, соғлиқни сақлаш вазирининг биринчи ўринбосари Амрилло Иноятов, Сирдарё вилояти ҳокими ўринбосари Дониёр Мадиримов, Фарғона вилояти ҳокими ўринбосари Иқболжон Эргашев, Тошкент шаҳар ҳокими ўринбосари Шароф Раҳмоновлар бор.