Рақобат қўмитаси “Ўзтемирйўлйўловчи” АЖ ва “Шаҳар атрофида йўловчи ташиш” МЧЖ томонидан истеъмолчилардан 1,3 миллиард сўмга яқин ортиқча ундирилган тўловларни қайтариши юзасидан кўрсатма бериб, молиявий жарима қўллаганди. “Ўзтемирйўлйўловчи” бунга муносабат билдирди.
Қўмита хабарида “Ўзтемирйўлйўловчи” АЖ Фарғона филиали (бўлинмаси) томонидан темир йўл вокзали (станциялари) бўйлаб 2023 йил давомида 606 380 та сотилган чипталардан воситачилик йиғим қиймати бўйича 660 миллион сўмга яқин ортиқча ҳақ ундирилгани аниқлангани кўрсатилганди.
Муносабатда билдирилишича, “Ўзтемирйўлйўловчи” АЖнинг 2023 йил учун ҳисобот ҳужжатларига асосан Фарғона филиалида шу давр мобайнида шаҳарлараро ва шаҳар атрофида ҳаракатланган 220 740 нафар йўловчиларга пуллик хизматлар кўрсатилган.
“Ўзбекистон Республикаси темир йўл транспортида йўловчилар, багаж ва юк багаж ташиш қоидалари”да “Шаҳарлараро йўловчи ташиш поездларидаги чиптанинг тўлиқ қиймати, ушбу поездларни ташкил этиш ва хизмат кўрсатиш билан боғлиқ амалдаги ҳаражатларни ҳисобга олган ҳолда белгиланади, Ўзбекистон Республикаси ва Тошкент шаҳар молия бошқармалари томонидан кўриб чиқилади ва тасдиқланади”, деб белгиланган.
“Ўзтемирйўлйўловчи” матбуот хизмати муносабатида айтилишича, мазкур филиал шаҳарлараро йўловчи поездлар чипта нархи 8 йил мобайнида ўзгаришсиз қолган бўлиб, ҳозирги кунда Қўқон—Марғилон—Андижон йўналиши 12 000 сўм қилиб белгиланган. Лекин ҳар бир йўловчи учун ташиш ҳаражати 30 000 сўмни ташкил қилади, яъни ҳаражатлар юқоридаги нарх билан умуман қопланмайди.
“Ўзтемирйўлйўловчи" АЖ Фарғона филиали томонидан молия бошқармасида чиптанинг тариф қиймати тасдиқлатилган бўлиб, воситачилик йиғими (3 000 сўм) ташувчи томонидан мустақил белгиланган, дейилади муносабатда.
Қайд этилишича, мазкур ҳолатда Фарғона филиали томонидан йўловчилардан асоссиз пул ундирилгани тўғрисида эълон қилинган хабар қўмитанинг апелляция кенгашида ёки судда кўриб чиқилади.
Аввалроқ нархларни сунъий ошириш йўли билан катта миқдорда даромад олган “Навоийазот” АЖга нисбатан чора кўрилиши ҳақида хабар берилганди. “Навоийазот” мазкур қарор ва кўрсатма устидан судга шикоят қилган. Суд ушбу шикоятни рад этган.
Рақобат қўмитаси “Лукойл” компаниясига нарх манипуляцияси орқали асоссиз олинган маблағни қайтариш мажбуриятини қўйганди. Ушбу компания ҳам қўмитанинг бу борадаги қарори устидан шикоят қилмоқчи.
Изоҳ (0)