Ўзбекистон вилоятлари ҳокимларига туризм ва спорт масаласи бўйича ўринбосар ва маслаҳатчи лавозими жорий этилади

Ўзбекистон Президентининг «Туризм соҳасини санитария-эпидемиологик хавфсизликнинг кучайтирилган режими талабларига қатъий риоя қилган ҳолда ривожлантиришга доир қўшимча чора-тадбирлар тўғрисида»ги қарорига асосан, 8 та вилоят ва Тошкент шаҳар ҳокимига туризм ва спортни ривожлантириш масалалари бўйича маслаҳатчи тайинланади. Бу ҳақда Адлия вазирлиги хабар берди.

Маълум қилинишича, қарорга мувофиқ Андижон, Жиззах, Қашқадарё, Наманган, Навоий, Сирдарё, Сурхондарё, Фарғона вилоятлари ва Тошкент шаҳар ҳокимининг туризм ва спортни ривожлантириш масалалари бўйича маслаҳатчиси лавозими жорий этилади.

Шунингдек, Тошкент, Самарқанд, Бухоро ва Хоразм вилоятларида ҳокимнинг туризмни ривожлантириш масалалари бўйича ўринбосари лавозими ўрнига тегишлича туризм ва спортни ривожлантириш масалалари бўйича ҳоким ўринбосари лавозими жорий қилинади.

Эслатиб ўтамиз, Президентнинг мазкур қарорига мувофиқ Ўзбекистонда коронавирусга чалинган туристларга 3 минг доллар миқдорида компенсация тўланади, мамлакатда янги имиграцион виза тури жорий этилади. Шунингдек, мазкур қарор билан Андижон халқаро аэропортига Заҳириддин Муҳаммад Бобур номи берилди.

Маълумот учун, Тошкент, Самарқанд, Бухоро ва Хоразм вилоятларида ҳокимнинг туризмни ривожлантириш масалалари бўйича ўринбосари лавозими 2017 йилда Ўзбекистон Президентининг «Туризм соҳасини ривожлантиришда маҳаллий ижро этувчи ҳокимият органларининг масъулиятини янада ошириш чора-тадбирлари тўғрисида»ги ПҚ-3129-сонли қарорига мувофиқ жорий қилинганди