Британиялик хонанда Элтон Жон Good Morning America телешоусига берган интервьюсида кўриш қобилиятини қисман йўқотгани сабабли янги альбом ёзиш ишларини якунлай олмагани ҳақида айтиб берди.
77 ёшли мусиқачи жорий йил ёзда ўткир инфекцияни бошдан ўтказгач, ўнг кўзи бутунлай кўрмай қолди. Қўшиқчининг чап кўзи ҳам яхши кўрмайди. Шу сабабли Элтон Жон бугунги кунда янги мусиқаларни басталай олмайди ва ҳатто қўшиқ матнини ўқий олмайди.
“Афсуски, июль ойида Франция жанубида юқтириб олган инфекция туфайли ўнг кўзим кўрмай қолди. Орадан тўрт ой ўтди, мен ҳали ҳам ҳеч нарсани кўрмаяпман. Чап кўзимнинг аҳволи ҳам яхши эмас”, деди юлдуз.
Фото: E! News
Соғлиғидаги жиддий муаммоларга қарамай, Элтон Жон ўзини дунёдаги энг омадли ва бахтли одам деб атайди:
“Мен ўғилларим билан фахрланаман. Шунингдек, мен ўз ҳолатим ва вазиятга бўлган хотиржам муносабатим билан ҳам фахрланаман. Мен жуда омадлиман ва бунинг учун миннатдорман”, деди у
Юлдуз сентябрь ойида ўзининг ташхиси ҳақида маълум қилган эди. Шифокорлар мусиқачини ушбу турдаги инфекциядан кейинги даволаниш ва тикланиш даври узоқ ва мураккаб кечиши ҳақида огоҳлантирган.
2023 йил август ойи охирида Элтон Жон уйида йиқилиб, Монакодаги касалхонага ётқизилган эди. Ўшанда хонанданинг танасида енгил тан жароҳатлари аниқланган.
Изоҳ (0)