Хонанда Шакира собиқ эри Жерар Пике билан ажрашиш пайтида харид қилинган қимматбаҳо машинадан халос бўлишга қарор қилди. У ҳаётида бўлиб ўтган тушкунлик даврини эслатувчи Lamborghini автомобилини мухлисларидан бирига ҳадя қилмоқчи.
2022 йилда маҳаллий телеканаллардан бири хонандага махсус буюртма асосида ишлаб чиқарилган бинафша ранг Lamborghini тақдим этган. Эндиликда хонанда собиқ турмуш ўртоғини эслатиб турадиган машинадан қутулиш учун Instagram обуначилари орасида автомобиль лотереясини ўтказмоқда.
“Мен расман машинамни мухлисларимдан бирига совға қилмоқчиман. Автомобилни энг яхши кўрган одамлари билан унутилмас лаҳзаларни ўтказишни истаган кишига бераман”, деб ёзди Шакира танлов ҳақидаги постга. Унинг сўзларига кўра, бу реклама эмас ва ҳеч нарса сотиб олишнинг ҳожати йўқ. Ўйинда иштирок этишнинг ягона шарти — бу иштирокчиларнинг ёши 18 га етган бўлиши лозим.
Маълумот учун, хонанда Шакира ва “Барселона”нинг собиқ футболчиси Жерар Пике 2010 йилги футбол бўйича Жаҳон чемпионати мадҳиясига айланган Wаkа Wаkа (Тhis Тime for Аfricа) қўшиғи учун клип суратга олингандан сўнг учрашишни бошлаган. Узоқ муддатли муносабатларга қарамай, улар расмий никоҳда бўлмаган. Жуфтлик 2022 йилнинг ёзида ажралишларини эълон қилди. Собиқ ошиқлар биргаликда Милан ва Саша исмли ўғилларни тарбиялаб келмоқда.
Изоҳ (0)