Britaniyalik xonanda Elton Jon Good Morning America teleshousiga bergan intervyusida ko‘rish qobiliyatini qisman yo‘qotgani sababli yangi albom yozish ishlarini yakunlay olmagani haqida aytib berdi.
77 yoshli musiqachi joriy yil yozda o‘tkir infeksiyani boshdan o‘tkazgach, o‘ng ko‘zi butunlay ko‘rmay qoldi. Qo‘shiqchining chap ko‘zi ham yaxshi ko‘rmaydi. Shu sababli Elton Jon bugungi kunda yangi musiqalarni bastalay olmaydi va hatto qo‘shiq matnini o‘qiy olmaydi.
“Afsuski, iyul oyida Fransiya janubida yuqtirib olgan infeksiya tufayli o‘ng ko‘zim ko‘rmay qoldi. Oradan to‘rt oy o‘tdi, men hali ham hech narsani ko‘rmayapman. Chap ko‘zimning ahvoli ham yaxshi emas”, dedi yulduz.
Foto: E! News
Sog‘lig‘idagi jiddiy muammolarga qaramay, Elton Jon o‘zini dunyodagi eng omadli va baxtli odam deb ataydi:
“Men o‘g‘illarim bilan faxrlanaman. Shuningdek, men o‘z holatim va vaziyatga bo‘lgan xotirjam munosabatim bilan ham faxrlanaman. Men juda omadliman va buning uchun minnatdorman”, dedi u
Yulduz sentyabr oyida o‘zining tashxisi haqida ma’lum qilgan edi. Shifokorlar musiqachini ushbu turdagi infeksiyadan keyingi davolanish va tiklanish davri uzoq va murakkab kechishi haqida ogohlantirgan.
2023-yil avgust oyi oxirida Elton Jon uyida yiqilib, Monakodagi kasalxonaga yotqizilgan edi. O‘shanda xonandaning tanasida yengil tan jarohatlari aniqlangan.
Izoh (0)