Европарламент аъзолари 22 ноябрь куни Страсбургда бўлиб ўтган ялпи мажлисда Россияни «терроризмга ҳомийлик қилувчи ва терроризм воситаларидан фойдаланадиган давлат» деб тан олувчи резолюцияга овоз берди. Бу ҳақда Reuters хабар берди.
Резолюция 494 та овоз билан қабул қилинган, 58 нафар депутат ушбу ҳужжатга қарши овоз берган, 44 нафари эса бетараф қолган. Ҳужжатда нафақат Украинадаги уруш билан боғлиқ айбловлар, балки Россияга қарши бошқа айбловларни ҳам бор. Резолюция, шунингдек, Европа Иттифоқи амалга ошириши керак бўлган реакция тўпламини таклиф қилади.
Шу тариқа, Европарламент ЕИ Кенгашини санкцияга киритилган шахслар рўйхатини кенгайтиришга, барча Европа Иттифоқига номзод давлатларни ва потенциал номзодларни ЕИнинг санкциялар сиёсатига қўшилишга чақиради.
Европарламент Европа Комиссияси ва Европа Иттифоқига аъзо давлатларни «Россияга санкцияларни четлаб ўтишга ёрдам беришга ҳаракат қилаётган давлатларга қарши мумкин бўлган чораларни кўриб чиқишни» таклиф қилади. Европарламент депутатларининг тавсиялари орасида «Россия ёқилғи ва уран импортига зудлик билан ва тўлиқ эмбарго қўйиш, шунингдек, ‘Шимолий оқим 1’ ва ‘Шимолий оқим 2’ газ қувурларидан бутунлай воз кечиш» ўрин олган.
18 ноябрь куни Европарламент Россияни «терроризм ҳомийси »деб тан олиш ҳақидаги резолюцияни тайёрлаганди. Сиёсий гуруҳлари ўртасида тўрт соат давом этган музокаралардан сўнг резолюция матни бўйича келишувга эришилган. Украина АҚШни бир неча бор Россияни «терроризм ҳомийси» сифатида тан олишга чақирган. Вашингтон ҳали бундай қадам ташлашга шошилмаяпти, бироқ Украина ташқи ишлар вазири Дмитрий Кулеба бир неча бор «йўқ» дейилгани, аммо охир-оқибат қарор қабул қилинганини таъкидлади.
Изоҳ (0)