«Дарё» нашри 23 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Зеленский украиналиклар «ҳар қандай сценарий»га тайёр туриши кераклигини айтди
Украина президенти Владимир Зеленский Украина янги ҳужумларга учраган тақдирда фойдаланиш учун 4 мингдан ортиқ ёрдам пунктлари яратилганини маълум қилди
Украинага янги ракета ҳужумлари содир бўлган тақдирда фойдаланиш учун 4 мингдан ортиқ «бузилмас пунктлар» — уяли алоқа, интернет, электр ва иссиқлик таъминоти билан жиҳозланган нуқталар тайёрлаб қўйилди. Бу ҳақда Украина президенти Владимир Зеленский ўз видеомурожаатида маълум қилди.
«Аҳолини қўллаб-қувватлаш бўйича янги «Бузилмас пунктлар» лойиҳамизни бутун мамлакат бўйлаб ҳам жорий қилмоқдамиз. Шу куннинг натижаси ўлароқ, 4 мингдан ортиқ ана шундай пункт тайёрланди. Яна кўп ишлар режалаштирилган», — деган президент.
Украина президенти шунингдек, бундай пунктларда «асосий хизматлар»нинг барчаси — электр, сув, иссиқлик, биринчи тиббий ёрдам қутиси, мобил алоқа ва «кеча-ю кундуз ишловчи мутлақо бепул» интернет мавжуд бўлишини таъкидлади. Бу пунктлар мактаблар, шифохоналар, вилоят ва туман ҳокимликлари қошида ишлайди.
Айни вазиятда Зеленский украиналиклар «ҳар қандай сценарийга» тайёр туриши кераклигини қўшимча қилди.
АҚШ МРБ босқиндан норози россияликларни агентликка ёлламоқчи
АҚШ Марказий разведка бошқармасининг разведка хизмати бошлиғи Дэвид Марлоу бошқарма Украинадаги урушдан норози россияликлар билан ҳамкорлик қилиш ниятида эканини айтди. Бу ҳақда The Wall Street Journal Марлоунинг баёнотига асосланиб хабар бермоқда.
Марлоунинг тушунтиришича, уруш бошланишидан олдин Россия президенти ўз мамлакатининг кучи Украина ва НАТОга таъсир ўтказа олиши ҳақида гапирган. «Аммо у бирин-кетин ҳаммасини бой берди», — дея қўшимча қилди разведка бошлиғи.
«Биз бутун дунё бўйлаб бунга (Украинадаги урушга) биз каби қарши бўлган россияликларни қидирмоқдамиз ... Биз ҳамкорликка тайёрмиз», — деган Марлоу.
The Wall Street Journal қайд этишича, разведка бошлиғининг сўзлари МРБ собиқ ходимларининг баёнотларига мос келади — уларда Россиянинг Украинага босқини россиялик ҳарбийлар, олигархлар, бизнесменлар ва уруш бошланганидан кейин Россияни тарк этганлар орасидан янги агентларни ёллаш учун қулай замин яратиши таъкидланган.
Украинада уруш бошланганидан кейин Россия ва Ғарб давлатлари юзлаб дипломатларни ҳудудидан чиқариб юборди. «РБК» ҳисоб-китобларига кўра, 2022 йилнинг январидан августигача дипломатик ваколатхоналарнинг 550 дан ортиқ ходими Россияга қайтарилган, уларнинг баъзилари жосусликда гумон қилинган. Россиялик дипломатларнинг аксарияти АҚШ, Болгария ва Польшадан чиқариб юборилган. Бунга жавобан Россия ҳам 300 дан ортиқ одамни чиқариб юборди.
Европарламент Россияга нисбатан янги резолюцияни қабул қилди
Европарламент аъзолари 22 ноябрь куни Страсбургда бўлиб ўтган ялпи мажлисда Россияни «терроризмга ҳомийлик қилувчи ва терроризм воситаларидан фойдаланадиган давлат» деб тан олувчи резолюцияга овоз берди. Бу ҳақда Reuters хабар берди.
Резолюция 494 та овоз билан қабул қилинган, 58 нафар депутат ушбу ҳужжатга қарши овоз берган, 44 нафари эса бетараф қолган. Ҳужжатда нафақат Украинадаги уруш билан боғлиқ айбловлар, балки Россияга қарши бошқа айбловларни ҳам бор.
Европарламент Европа Комиссияси ва Европа Иттифоқига аъзо давлатларни «Россияга санкцияларни четлаб ўтишга ёрдам беришга ҳаракат қилаётган давлатларга қарши мумкин бўлган чораларни кўриб чиқишни» таклиф қилади.
Европарламент депутатларининг тавсиялари орасида «Россия ёқилғи ва уран импортига зудлик билан ва тўлиқ эмбарго қўйиш, шунингдек, ‘Шимолий оқим 1’ ва ‘Шимолий оқим 2’ газ қувурларидан бутунлай воз кечиш» ўрин олган.
Тайван Хитой қирувчилари ва кемалари оролга яқинлашаётгани ҳақида хабар бермоқда
Тайван мудофаа бошқармаси оролга туташ ҳудудда Хитой халқ озодлик армияси (ХХОА) Ҳарбий-денгиз кучларининг тўртта кемаси, иккита қирувчи самолёти ва бир ҳарбий вертолётини аниқлади, деб ёзмоқда «РБК» бошқарма хабарига таяниб.
«Бугун, соат 6:00 ҳолатига (Тошкент вақти билан 3:00) Тайван атрофида ҳудудда Хитой халқ озодлик армияси нинг учта учар аппарати ва тўртта кемаси аниқланди», — дейилади хабарда.
Тайван Мудофаа вазирлиги маълумотларига кўра, манёврлар давомида Хитойнинг иккита Ж-16 қирувчи самолёти жануби-ғарбий ҳудуддаги Тайван ҳаво ҳужумидан' мудофаа идентификация зонасига кирган, орол шарқида эса сувости кемасига қарши Ка-28 вертолёт қайд этилган.Тайван армияси бунга жавобан самолётларни ҳавога кўтарди, радиоогоҳлантиришлар берди ва зенит-ракета тизимларини шайлади.
Умуман олганда, Тайван Хитойдан ажралиб чиққани ҳақида 1949 йилда, фуқаролар уруши даврида эълон қилган. Пекин оролнинг мустақиллигини тан олмайди ва уни ўз провинцияси деб ҳисоблайди.
Ўзбекистон ерларининг шўрланиб бориши қишлоқ хўжалигини чеклашга олиб келмоқдами?
Экспертларнинг баҳолашига кўра, бугунги кунда Ўзбекистондаги 70 фоиздан ортиқ ер майдонлари деградацияга учраган бўлиб, ҳар йили 830 млн долларлик йўқотишлар кузатилмоқда. Бу ҳақда Сенат матбуот хизмати хабар берди.
Хусусан, энг кўп шўрланган ерлар Қорақалпоғистонда (90-95 фоизни), Бухорода (96 фоизни) ва Хоразм воҳасида (95-100 фоизни) жойлашган. Давлат экология қўмитасининг маълумотига кўра, органик моддаларнинг 30-40 фоизга камайиши ҳисобига республика ҳудудининг 40 фоиз тупроқлари унумдорлиги пасайган.
Шу билан бирга, 800 минг гектарга яқин суғориладиган ерлар суғориш техникаси ҳамда ерларни текислаш тадбирлари нотўғри амалга оширилаётгани туфайли эрозияга учрамоқда.БМТнинг барқарор экотизимлар ва чўлланиш бўйича Глобал маркази экспертлари яқин йилларда ерларнинг деградацияси қишлоқ хўжалиги ривожланишини чеклашга олиб келиши мумкинлигини таъкидлаган.
«Ўзбекистонда ерларни деградация ва чўлланишга қарши курашиш бўйича бир қатор тадбирлар олиб борилиши, Кейинги йилларда ердан фойдаланиш, қишлоқ хўжалиги, сув хўжалиги, ўрмон хўжалиги соҳалари ва атроф муҳитни муҳофаза қилиш масалалари бўйича кўплаб меъёрий ҳуқуқий ҳужжатлар қабул қилинган бўлса-да, бундай ҳолатларнинг олдини олишда замонавий инновацион технологияларни жорий этиш муҳим масала», — дейилади Сенат хабарида.
Изоҳ (0)