Европа иттифоқи Украинага макромолиявий ёрдам кўрсатиш шартларини, жумладан, Россиянинг музлатилган активларидан тушган маблағлардан 35 миллиард евро миқдоридаги кредит ажратишнинг шартларини эълон қилди.
Уни олиш учун Украина Европа иттифоқининг “самарали демократик механизмларини қўллаб-қувватлаши ва ҳурмат қилиши” керак бўлади.
Ҳужжатга кўра, бу талаб кўппартиявийлик парламент тизимини қўллаб-қувватлаш ва қонун устуворлигини таъминлаш зарурлигини ўз ичига олади. Бундан ташқари, Украина ҳукумати инсон ҳуқуқлари, жумладан, озчиликлар ҳуқуқларига риоя этилишини кафолатлаши керак. Қайд этилишича, бу фақат дастлабки шартлар бўлиб, уларнинг бажарилиши Европа комиссияси ва Европа ташқи ҳаракатлар хизмати томонидан назорат қилинади.
“Агар комиссия ушбу модданинг 1-бандида кўрсатилган шарт бажарилмаган деб топса, у кредит тўловлари ва бошқа ёрдам кўрсатишни тўхтатади”, дейилади Европа иттифоқининг расмий журналида эълон қилинган материалда.
Аниқлик киритилишича, кредит ҳам бир қатор сиёсий шартларга боғлиқ бўлиб, улар Европа иттифоқи ва Украина ўртасидаги англашув меморандумида белгилаб қўйилади. Бундан ташқари, бошқа донорлар билан икки томонлама кредитларни мувофиқлаштириш ва бир-бирини тўлдиришни таъминлаш чораларини кўриш тавсия этилади.
22 октябрь куни Европарламент Украинага Россиянинг музлатилган активларидан тушган даромаддан фойдаланган ҳолда қайтариладиган кредит беришни қўллаб-қувватлади. 35 миллиард евро миқдоридаги кредит 2025 йилдан бошлаб бир неча траншларда тўланиши кутилмоқда.
Европа комиссияси 2025 йилда Украинанинг ташқи молиялаштириш эҳтиёжларини 41,6 миллиард долларга баҳолади, бу кутилганидан 15,6 миллиард долларга юқори. Франция президенти Эммануэль Макрон Европа Иттифоқининг Украина учун кредитлар бўйича харажатларини оширишга қарши чиқди.
Изоҳ (0)