«Назаримда, Россияга нисбатан босимлар Путин ҳокимиятдан кетганидан кейин ҳам тўхтамайди», деб ёзади сиёсатшунос Камолиддин Раббимов Telegram’даги каналида.
Камолиддин Раббимовнинг фикрича, Путин империячилик орзулари оқибатида Россия қудратига жиддий зарба бериб қўйди.
Европа парламенти кўпчилик овоз билан Россияни «терроризм ҳомийси бўлган давлат» (государство-спонсор терроризма) деб тан олибди. Бу қарор, ҳозирча рамзий-сиёсий маънога эга ва реал ҳуқуқий оқибатлари мавжуд эмас. Лекин бу катта қадамларнинг бошланиши бўлиши мумкин. Европарламент Европа комиссияси ва кенгашини Россияга нисбатан «террор ҳомийси бўлган давлат» сифатида муомалада бўлишга чақирган. Яъни, расмий Москвани тўлиқ ихоталаш тавсия қилинган.Аввалроқ Камолиддин Раббимов Украина ва Россия ўртасидаги уруш Марказий Осиё минтақаси учун тарихий бонус бўлиши мумкинлигини айтганди.АҚШда ҳам бир неча ойдан бери Россияни «терроризм ҳомийси бўлган давлат» сифатида баҳолаш чақириқлари бор. Лекин Байден маъмурияти бу таклифга қарши. Чунки АҚШ қонунчилигига кўра, Вашингтон қайси бир давлатни «терроризм ҳомийси» деб тан олса, унга нисбатан реал ҳуқуқий механизмлар ишлаши керак. Россияга нисбатан шундай механизмларни жорий қилишни оқибатлари глобал даражада катта ўзгаришларга олиб келади.
Мисол учун, Россия БМТнинг Хавфсизлик кенгаши доимий аъзоси. Агар Россия «терроризм ҳомийси бўлган давлат» деб тан олинса, БМТ Хавфсизлик кенгашидан чиқарилиши назарда тутилиши керак. Бунинг учун, Хавфсизлик кенгашининг қолган доимий аъзолари ҳам бунга розилик бериши лозим. Қолаверса, Россия билан АҚШ ва ғарб давлатларининг дипломатик муносабатлар деярли узилиши ёки жуда пасайиши керак бўлади.
Назаримда, Россияга нисбатан реал босимлар Путин ҳокимиятдан кетганидан кейин ҳам тўхтамайди. Россияни қўлидан ядро қуролини олиб қўйиш, БМТ Хавфсизлик кенгашидаги уни вето ҳуқуқини олиш ташлашга интилиш ҳам кучаяди. Путин Россияни қайтадан империяга айлантиришни орзу қилиб, уни бор қудратига ҳам тарихий зарба бериб қўйди. Россия бу вазиятдан 2021 йилдаги каби жамулжам ресурслар ва қудрат билан чиқа олмайди, албатта, заиф ёки ўта заиф ҳолатда чиқади.
Камолиддин Раббимов, сиёсатшунос.
«Ҳозир Марказий Осиё минтақаси учун янги давр кириб келмоқда. Айни дамда жаҳондаги энг йирик уруш постсовет ҳудудида (Украина ва Россия ўртасида — таҳр.) бўлиб ўтмоқда. Аввалига бу уруш кўпчиликни қўрқитди. Аммо ҳозирга келиб бу воқеа Марказий Осиё минтақасининг геосиёсий жиҳатдан мустақил бўлишида тарихий бонусга айланаётганини кўриш мумкин», – деган эди Камолиддин Раббимов Марказий Осиё экспертлари форумида.
Изоҳ (0)