Европарламент Европа Иттифоқининг жиноий келиб чиққан активларни мусодара қилиш бўйича директивасини маъқуллади. Бу Россиянинг Украинага ҳужуми сабабли музлатилган маблағларидан Украинани тиклаш учун фойдаланиш имконини беради. Бу ҳақда Deutsche Welle хабар берди.
Ҳужжатга кўра, Европа Комиссияси мусодара қилинган активлар ва мол-мулкдан товон тўлаш, қайта тиклаш ва халқаро жиноятлардан жабрланган давлатларга товон тўлаш учун фойдаланиш бўйича тавсиялар ишлаб чиқиши керак.
Агар активлар Россиянинг Украинага ҳужуми ёки унга алоқадор жиноятлар билан боғлиқ ҳолда мусодара қилинган бўлса, улардан олинган соф даромадлар Украинани тиклаш учун ишлатилиши керак, — дейилади резолюцияда.
Капиталнинг келиб чиқишини янада самарали текшириш учун ЕИда фаолият юритувчи активларни қайта тиклаш бўйича идораларга катта ваколатлар берилади. Бундан ташқари, Европа Иттифоқи энди мусодара қилишнинг иккита янги турини жорий қилади: айблов ҳукмисиз мусодара ва келиб чиқиши номаълум активлар мусодараси.
Европарламентнинг активларни мусодара қилиш масаласи бўйича маърузачиси Лорант Винче янги директива “халқаро жиноий ташкилотлар оладиган молиявий фойдани мақсад қилганини” таъкидлаган.
Бу гуруҳларнинг ЕИдаги даромади 150 миллиард еврони ташкил этади ва бу активларнинг атиги бир фоизи мусодара қилинган. Бунинг сабаби, ЕИ ҳуқуқ-тартибот идоралари пулнинг жиноий келиб чиқишини тезда аниқлай олмагани ва мамлакатлар ўртасида, ҳатто ЕИ доирасида ҳам маълумот алмашинуви чекланган эди, — қўшимча қилган Винче.
Маърузачига кўра, энди жиноятчилар томонидан мусодара қилинмаслик учун қўлланилаётган қонунчиликдаги камчиликлар “жиноий фаолият билан боғлиқ келиб чиқиши номаълум бўлган мол-мулкни мусодара қилиш тўғрисида”ги банд орқали бартараф этилади.
Изоҳ (0)