АҚШ Россиянинг ядровий доктринасини янгилаши муносабати билан жавоб чораларини кўришни режалаштирмаяпти.
Бу ҳақда Оқ уй вакили Карин Жан-Пьер брифингда маълум қилган.
Биз Россиянинг баёнотларига жавобан ядро сиёсатимиз ёки доктринамизни ўзгартириш учун ҳеч қандай сабаб кўрмаяпмиз, деб таъкидлади Жан-Пьер.
У, шунингдек, Қўшма Штатлар “Россиянинг ядровий доктринасини ўзгартириш қароридан ҳайратга тушмаганини” айтиб ўтди.
“Россия бир неча ҳафта давомида ўз доктринасини янгиламоқчи эканини билдириб келаётганди”, деди Оқ уй матбуот котиби.
19 ноябрь куни Россия президенти Владимир Путин янги ядровий доктрина асосларини тасдиқлаган эди.
Янги доктринага кўра, Украинанинг Россияга қарши Ғарбнинг ядросиз ракеталарини қўллаши ядровий жавоб зарбасига олиб келиши мумкин, дея тушунтириш берди расмий Кремль.
Шу билан бирга, Россия ташқи ишлар вазири Сергей Лавров мамлакат ҳар доим ядро урушининг олдини олиш тарафдори эканини маълум қилган.
Биз ядровий урушнинг олдини олиш учун ҳамма нарса қилиниши керак, деган позицияга қатъий амал қиламиз. Ядровий қурол, энг аввало, ҳар қандай ядровий урушни тўхтатиш, олдини олиш, тийиб туриш воситаси эканига аминмиз. Биз вазиятга шундай ёндашамиз, деди Россия ТИВ раҳбари.
Изоҳ (0)