Россия ташқи ишлар вазири Сергей Лавров мамлакат ҳар доим ядро уруши олдини олиш тарафдори эканини айтди.
У Украина Қуролли кучлари Американинг ATACMS ракеталари билан Брянск вилоятига берган зарбасига Россия қандай жавоб бериши мумкинлиги ҳақидаги саволга шундай фикр билдирди.
Лавровнинг сўзларига кўра, бундай ҳужумларни Россия “Ғарб урушининг сифат жиҳатидан янги босқичи” деб ҳисоблаши мумкин ва уларга “мос равишда” жавоб беради.
“Биз ядровий урушнинг олдини олиш учун ҳамма нарса қилиниши керак деган позицияга қатъий амал қиламиз. Ядровий қурол, энг аввало, ҳар қандай ядровий урушни тўхтатиш, олдини олиш, тийиб туриш воситаси эканига аминмиз. Биз вазиятга шундай ёндашамиз”, деди Россия ТИВ раҳбари.
Вазирнинг сўзларига кўра, президент Владимир Путин бугун, 19 ноябрь куни маъқуллаган янгиланган Россия доктринасида Американинг ядро бўйича доктриналаридан фарқ қиладиган ҳеч нарса йўқ.
Янги доктринага кўра, Украинанинг Россияга қарши Ғарбнинг ядросиз ракеталарини қўллаши ядровий жавоб зарбасига олиб келиши мумкин, дея тушунтириш берди расмий Кремль.
Айни пайтда АҚШ Миллий хавфсизлик кенгаши вакили Bloomberg агентлигига Россиянинг ядровий доктринасини янгилаш қарорига жавобан Қўшма Штатлар ўзининг ядровий тийиб туриш сиёсатини ўзгартиришга ҳожат йўқлигини айтди. Исмини ошкор этмаган америкалик мулозимнинг қўшимча қилишича, АҚШ президенти маъмурияти Россия томонидан киритилган ўзгаришлардан ажабланмаган.
Россия мудофаа вазирлиги маълумотларига кўра, 19 ноябрга ўтар кечаси Украина Қуролли кучлари Брянск вилоятига олтита ATACMS ракетаси билан ҳужум қилган. Бундан икки кун олдин оммавий ахборот воситалари Қўшма Штатлар Украинага узоқ масофали ракеталар билан Россия Федерацияси ҳудудига зарбалар йўллашга рухсат бергани ҳақида хабар қилганди.
Америка расмий вакилларидан ҳозиргача фақат давлат котибининг Ғарбий яримшар бўйича ёрдамчиси Брайан Николс тақиқ бекор қилинганини тасдиқлади.
Изоҳ (0)