Россия Илм-фан вазирлиги муҳожирлар учун рус тили имтиҳонига оғзаки қисмни киритиш таклифини қўллаб-қувватлади. Бу ҳақда вазир ўринбосари Константин Могилевскийга таяниб, “ТАСС” хабар берди.
“Россия Таълим ва илм-фан вазирлиги меҳнат муҳожирлари учун рус тили имтиҳонига оғзаки қисмни қўшиш бўйича таклифларни қўллаб-қувватламоқда. Шу билан бирга, ушбу таклифларни амалга ошириш учун Имтиҳон ўтказиш тўғрисидаги низомга тегишли ўзгартиришлар киритиш зарур”, дейди вазир ўринбосари.
Россияда 2014 йилдан бошлаб меҳнат муҳожирлари ишчи патенти, яшаш гувоҳномаси ва фуқароликни олиш учун рус тили, қонунчилик асослари ва мамлакат тарихи бўйича имтиҳон топшириши керак.
2024 йил июль ойида Илм-фан вазирлиги январь ойидан бери имтиҳон топширмаган муҳожирлар улуши 10 баробарга ошгани ҳақида хабар берганди.
Охирги 10 йил ичида Россияда меҳнат муҳожирлари сони икки баравар камайди. Хусусан, 2012-2014 йилларда мамлакатда бир вақтнинг ўзида 7 миллионгача чет элликлар ишлаган бўлса, 2022-2023 йилларда уларнинг сони 3-3,5 миллиондан ошмаган.
Изоҳ (0)