Чеченистон раҳбари Рамзан Қодиров Россиядаги миграция сиёсатини танқид қилди. У ушбу сиёсатнинг кескинроқ бўлиб бораётганини айтиб, мигрантларга нисбатан қўлланилаётган бир қатор чоралар уни ҳафсаласини пир қилаётганини таъкидлади.
Кимдир Россияни атайлаб қўшни биродар ҳудудлар билан тўқнаштираётгандек туюлмоқда. Миграция сиёсатини ўзгартириш керак бўлса ҳам, буни маҳаллий бўлмаган ҳар қандай учраганига шафқатсизларча ташланадиган даражада жирканч усулда амалга оширмаслик лозим. Сўнгги пайтларда одамларни ҳеч қандай расмиятчиликсиз ушлаб туришмоқда, бу тадбирлар эса тобора қаттиқ ўтказилмоқда, деди Қодиров.
У муҳокама қилинаётган муаммоларни мигрантларни депортация қилиш орқали ҳал қилиб бўлмаслигини таъкидлади.
Бу муаммо келгиндилар туфайли юзага келгани йўқ. Бунинг илдизи ўз вақтида ўз ваколатига кирадиган масалалар билан шуғулланиши ва ҳар қандай кескинлашаётган жараёнларга тезкор муносабат билдириши лозим бўлган шахсларнинг бепарволигида ётибди. Фақат амалда ҳеч қандай назорат йўқ эди, деди Чеченистон раҳбари.
Қодиров жамиятда мигрантларга нисбатан нафратни шакллантириб ҳеч нарсага эришиб бўлмаслиги, бу вазиятни чигаллаштиришини айтди.
Ҳеч бўлмаса энди миграция назоратининг самарали тизимини йўлга қўйиш, бу соҳада тўғри сиёсат юритиш керак. Бироқ, бошқа мамлакатлар фуқароларини тартибсиз инквизиция қилиш асло тўғри эмас. Муаммонинг илдизини йўқотиш лозим, оқибатлари билан шуғулланиш эмас, деди у.
Чеченистон раҳбари, шунингдек, мигрантлар орасида қонунга итоат этувчилар ҳам борлигини эслатди.
Майли, бугунги мигрантларни оммавий таъқиб ва тозалашлар орқали ҳайдаб чиқарамиз, бироқ эртага бошқа давлатлардан янгилари келади-ку, улар яхшироқ бўлишига ким кафолат бера олади?, дея хулоса қилди Қодиров.
Изоҳ (0)