Қурилиш ва уй-жой коммунал хўжалиги вазирлиги Тошкент шаҳар бош режаси тадбиркор таклифи ёки буюртма асосида ўзгармаслигини маълум қилди.
Аввалроқ қурилиш вазири ўринбосари Давронжон Одилов девелопер Мурод Назаровнинг бош режага ўзгартириш киритилаётгани ҳақидаги гапига муносабат билдириб, бош режа тадбиркорнинг таклифи билан ўзгармаслигини маълум қилганди.
Мурод Назаровнинг айтишича, тадбиркорлар қурилиш жараёнига халал бергани учун айрим дарахтларни кесишга мажбур бўлади.
“Тошкент шаҳри бош режасига тузатиш киритиляпти. Яқинда чиқиб қолади, кутяпмиз. Бундан буён пойтахтда қурилишлар ё реновация, ё реконструкция ҳудудларида бўлади. Табиийки, бўш жой йўқ. Ҳар бир бино атрофида дарахт бор. Дарахтларни ўйламасдан кесиб ташлашгани учун катта резонансга олиб келиб, мораторий қўйилганди.
Лекин тан олиш керак, бу жойларда ҳатто реконструкция пайтида техникани қўяман деса ҳам, дарахтлар халақит беради. Ва қанақадир йўллар билан барибир ҳам дарахтлар кесиляпти. Чеклов қўйиш керак эмас. Чекловлар коррупцияни кучайтиради. Имтиёзларга ҳам қаршиман”, дейди бизнес вакили.
“Вазир ўринбосари бош режага ўзгартириш киритилмайди, деганда тадбиркорнинг ўзгартириш киритилиши режалаштирилган ‘коррексияси’ ҳақидаги фикрига жавоб берган. Тадбиркорнинг таклифи ёки тадбиркор ғояси билан бош режа ўзгартирилмайди. Балки бош режа доимий такомиллашиб борадиган жараён”, дейилади Қурилиш вазирлиги хабарида.
Қайд этилишича, вазир ўринбосари шаҳарнинг бош режаси такомиллашуви ҳақида гапирмаган. Тадбиркор назарда тутган шахсий манфаатидаги маълум бир ўзгаришни назарда тутган.
Бош режани ишлаб чиқишда илмий асослар, шаҳарсозлик талаблари ва жамоатчилик фикри устувор аҳамият касб этади. 1969 йилда ташкил этилган “Тошкентбошпланлити” институти ушбу жараёнда доимий равишда илмий изланишлар олиб боради ва доимий равишда Тошкент ва Самарқанд шаҳарларининг бош режаларини такомиллаштириб боради, дейилади вазирлик хабарида.
Изоҳ (0)