“Надомат” лойиҳасининг навбатдаги суҳбатдоши айни дамда 21-сонли аёллар колониясида жазо муддатини ўтамоқда. У Ўзбекистон Республикаси Жиноят кодексининг 273-модда 5-қисми билан айбдор деб топилиб, 12 йилга озодликдан маҳрум этилган.
Маҳкума — 39 ёшда. Тожикистон фуқароси.
У катта миқдордаги гиёҳванд моддани Ўзбекистонга олиб киришга уринган вақтида қўлга олинган.
“Ҳомиладорлигимда турмуш ўртоғим гиёҳванд модда берган”
— Турмуш ўртоғим героин истеъмол қиларди. Пул топиш мақсадида оғуфурушлик бизнесига ўтди. Ўша вақтларда қизимга ҳомиладор эдим, уйимизда усталар ишларди, қаттиқ чарчардим. Шундан оз-оздан истеъмол қилиб юрсанг енгил бўласан деб, эрим гиёҳванд моддалардан берарди. Қаттиқ ўрганиб қолдим. Шу орада эримни қўлга олишди, Қозоғистонда 16 йилга ҳукм ўқилди. Кейинроқ мен Тожикистонда 12 йилга қамалдим. Амнистия берилиб, 3 йилда озод қилиндим, — дейди маҳкума.
“Афв қилинганимдан кейин яна шу жиноят билан Ўзбекистонда қўлга тушдим”
— Қилмишимдан пушаймон бўлиб тавба қилгандим. Лекин озодликка чиққанимда бир аёл шу оғуни топиб беришимни сўраб қўймади. Ўзимга ҳам пул зарур эди, рози бўлдим. Қозоғистонлик харидорлар келади, 10 кг гиёҳванд модда керак деди. Қидирдим, ўзбекистонлик бир аёл 7 кг миқдорда борлигини айтди. У ва мижозлар билан Самарқандда кўришдик, 1 кг моддани қўлдан қўлга беришимиз билан бизни ушлашди, — дейди маҳкума.
“Фарзандларим билан алоқа қилолмайман”
— Фарзандим ҳозир 2 та, бир қиз, бир ўғил. Катта ўғлим Тожикистондалигимда вафот этган. Ундан кейин яна фарзанд хоҳладик, эрим қамоқхонадалигида кўришишга рухсат берилди. Ҳомиладор бўлдим, ўғил фарзандлик бўлдик. Гиёҳванд моддалар истеъмол қилганим ҳомиламга ҳеч қандай таъсир ўтказмаган, қизим соғлом. Балки мен билмаган нуқсони бордир, бехабарман. Ҳозир болаларимга онам қарайди. Улар билан 8 ойдан бери алоқа йўқ, чет эл фуқароларига телефон берилмас экан, — дейди маҳкума.
— Мен тўғри йўлдан кетолмадим, адашдим. Ҳеч қайси аёл ёмон йўлга кириб кетмасин, ҳеч ким менга ўхшаб афсусланишини хоҳламайман.
Видеони тўлиқ ҳолда YouTube’даги “Дарё медиа” каналида томоша қилишингиз мумкин.
Изоҳ (0)