“Келиним сабаб 70 ёшда кампиримни ўлдирдим” — 83 ёшида озодликка чиқадиган маҳкум надоматлари (видео)

“Надомат” лойиҳасининг навбатдаги суҳбатдоши 2019 йили мудҳиш жиноятга қўл уриб, озодликдан маҳрум этилган. У айни кунда жазо муддатини Оҳангарон шаҳридаги 44-сон манзил колониясида ўтамоқда.

Маҳкум 75 ёшда, у Жиноят кодексининг 97-моддаси билан айбдор деб топилиб, 13 йилга озодликдан маҳрум этилган. У оилавий келишмовчилик сабаб аёлини қасддан ўлдирган.

— Аёлим ўзимдан олти ёш кичик бўлган. У билан яшаганимизда кўплаб оилавий муаммолар бўлди, ҳатто жанжаллардан чарчаб уйдан ҳам чиқиб кетдим. Аммо маҳалла-кўй аралашиб, яна уйга олиб келишди. У билан икки қиз ва икки ўғил фарзандли бўлдик. Феъли сабаб болаларнинг ҳам ҳаётига кўп аралашарди. Қудалар ўртасидаги арзимас жанжаллар сабаб икки қизим уйимизга қайтиб келди.

Кенжа ўғлим билан бирга яшардик. У билан ҳам ҳеч келишолмади. Арзимас нарсани баҳона қилиб келин билан жанжал қилаверарди. 2019 йилнинг март ойида ҳам катта жанжал бўлди. Орадан бир қанча вақт ўтганидан кейин жанжаллар янада йириклашди. “Уйдан чиқиб кецин”, деяверарди. У кетса, ўғлингнинг аҳволи нима кечади, ҳар ҳолда учта боласи бор, деб тушунтиришга ҳаракат қилдим. Фойдаси бўлмади, кўп ҳақорат қиларди. Унинг айтган гапларини айтишга ҳам уяламан. Охирги жанжал куни келиним набирам билан дўконга чиқиб кетганди. Уни суюғоёқликда айблади, куракда турмайдиган гапларни айтди. Охири чидолмай, ошхона пичоғини тиқиб олганимни билмай қолдим. Уч марта тиққанимдан кейин эшикни қулфлаб, келинимга уйга кирманглар, деб ўзимни ички ишлар ходимларига топширдим.

Тўғри, ўша пайт жаҳлимни жиловлай олмадим, ақлни ишга солмаганим панд берди. Аммо бу йиллар давомида йиғилганди. Менга ҳам 70 ёшда қамоқхонага келиш ҳавас эмасди. Афсуски, жаҳлни жиловлай олмай, жиноятга қўл урдим.

Беш йилдан буён озодликдан маҳрумман. Шароитлари яхши, аммо набираларимни соғинаман. Вақти-вақти билан болаларим келиб, хабар олишади. Онамни ўлдиргансиз, деб ташлаб қўйишгани йўқ. Бу ердаги шароит қанчалик яхши бўлмасин, барибир озодликка етмайди. Айниқса, ёш йигитларнинг кўплиги кўнглимни хира қилади, дейди маҳкум.

Видеони қуйида тўлиқ ҳолда томоша қилинг.