“Надомат” лойиҳасининг навбатдаги суҳбатдоши эндигина 24 ёшни қаршилаган. Афсуски у гулдек ёшлигининг 4 йилини панжара ортида ўтказишга маҳкум. Энг ёмони эса она меҳрига муҳтож икки гўдаги уни қумсаб улғаймоқда.
Маҳкума Лайло Бўронова 24 ёшда, у Жиноят кодексининг 168-моддаси 3-қисми билан 4 йилга озодликдан маҳрум қилинган. Аёл сохта тилла тақинчоқлар сотиб, фирибгарлик билан шуғулланган.
— Беш ёшимда отам вафот этган. Онам мен ва укамни боқиш учун қийин кунларни бошдан кечирган. Мактабга чиққанман, аммо молиявий аҳволимиз яхши бўлмагач иккинчи синфдан кейин бувим мени қишлоққа олиб кетган. Бувимнинг қўлида тарбия кўрганмиз. Онам 2012 йили ва 2016 йили турмушга чиқди ва бешта фарзандли бўлди. 2017 йили мени ҳам турмушга беришди. Турмуш ўртоғим билан 2020 йилгача яшаб, иккита қиз фарзандли бўлдик. Икки болам билан бувимнинг уйига бориб, яшадик. 2022 йили онам Жиноят кодексининг 168-моддаси билан қамалиб қолди. Олти нафар укам ва икки қизимни боқиш, тарбиялаш масъулияти менга тушди.
-nZyBLITx.jpg)
Уйим йўқ бўлгани учун кўп қийналдик. Чевархонага ишга кирдим, аммо у ердан олган маошим ижара пулига етса, рўзғорга етмасди. Шундан кейин тилла сотишга қарор қилдим.
Тиллаларни насияга олиб, уларни сотиб, кейин пулини берардим. Бир мижоз мендан тиллаларни текшириб сотиб олди, ҳаммаси яхши эди. Аммо бир ой ўтганидан кейин тиллалар сохта эканлиги ҳақида устимдан шикоят ёзди.
Онам икки дугонаси билан катта миқдорда тилла тақинчоқлар сотган. Тиллаларга проба урилмагани ва лицензияси йўқлиги сабаб қўлга олинган. Уларнинг суммаси катта бўлгани учун онам қаттиқ тартибдаги қамоқхонада жазо муддатини ўтайди.
Мен тиллани 350 минг сўмдан олиб, граммига 150 мингдан қўйиб сотардим. Сотгандан кейин насияни узардим. Тергов бошланганида у йигитга бу ҳақда айтдим, “Майли тиллани олиб келишсин, қайтариб оламан, фақат мен ҳақимда айтсанг, пулни тўлашга ёрдам бермайман”, деди. Шу боис қўрқдим, аммо у бола даъвогарларнинг суммасини тўлашга ёрдамлашди. Аризаларга кўра, 490 миллион сўм пул тўлашим керак эди, ҳозир 85 миллион сўм қолган. Аммо тўлолдик. Онам иккимиз кетма-кет қамалиб, бувимни ҳам қийнаб қўйдик.
Озодликдан маҳрум этилганимдан кейин кўп нарсалар ҳақида ўйладим. Тўғри, жиноят қилишимизнинг ўзи шармандалик. Аммо мен шунга мажбур бўлганман. Агар турмуш ўртоғим ёки ўгай отам ёрдам берганида, ҳеч қачон бу иш билан шуғулланмаган бўлардим. Ҳали турмушимдан қонуний ажрашмаганман, аммо унинг оиласи бор. “Ортиқча пулим йўқ, судга аризани ўзинг топшир”, деган. Қамалганимдан кейин болаларимни ҳам олиб кетган, улар билан телефонда бўлса ҳам гаплаштирмайди. 4 ва 3 ёшли қизларимни икки йилдан бери кўрганим йўқ. Уларнинг катта бўлаётганини кўра олмаётганим, ёнида бўла олмаётганим алам қилади. Кўп соғинаман, ҳамиша уларни қумсайман, дейди маҳкума Лайло Бўронова.
Видеони тўлиқ ҳолда YouTube’даги “Дарё медиа” каналида томоша қилишингиз мумкин.
Изоҳ (0)