“Надомат” лойиҳасининг навбатдаги қаҳрамони Дадажон Юсупов айни дамда жазо муддатини Оҳангарон шаҳридаги 44-сон манзил колониясида ўтамоқда. У осон мўмай даромад топишга қизиқиб, онлайн қиморга берилган. Ўзига таниш бўлган фуқародан 27 минг АҚШ доллари миқдоридаги пулни олиб, уни қиморда бой берган.
Маҳкум Дадажон Юсупов 1977 йил Фарғона вилоятида туғилган. У Жиноят кодексининг 168-моддаси 4-қисми “а” банди билан айбдор деб топилиб, 5 йилга озодликдан маҳрум этилган.
— 2006 йилдан буён фермер хўжалиги ташкил қилиб, унга раҳбарлик қилардим. Олий маълумотли иқтисодчи бўлганим учун ҳаммаси жойида эди. Аммо орада дўстларим онлайн қимор ўйнашларини билиб қолдим. Аввалига бу оддий ўйиндек туюлди. Яъни қайси футбол жамоаси ютиши ҳақида сўрашарди, тахмин қилсам, бир кундан кейин ютишганини айтиб, бозорлик қилиб зиёфат қилишарди. Кейин менга ҳам “Пулинг бор, ўйинга тик, яхши даромад топасан”, дейишди.
Аввалига ҳаммаси осондек туюлди, “ставка” қилинади ва даромад олинади. Аммо инсон азартга берилиб, боридан айрилганини ҳам билмай қоларкан. Вазият шунчаликка бордики, фермер хўжалиги ҳисобидаги пулларни ҳам тикиб юбордим.
Ютиш инсонга умид бераркан, бир марта 27 минг АҚШ доллари фойда кўрдим. Аммо уни картадан ечиб олиш насиб қилмади. Чунки ўша куни шанба эди ва банкоматларда бунча катта пул бўлмагани учун уни ҳам “ставка” қилдим. Картамда 27 минг доллардан ташқари 7 500 АҚШ доллари ҳам бор эди. Бир неча соатда бор пулимдан айрилдим.
Ҳеч ким менинг қамалишимга ишонмасди, ота-онамга ва фарзандларимга жабр қилдим. Чунки улар мени яхши инсон деб билишарди.
Ўйинга шу қадар берилиб кетганимдан уйимда қўлга илинадиган нарсаларнинг барини олиб чиқиб сотдим. Энг ёмони ота-онам билан яшайдиган уйни ҳам сотишга қарор қилганим бўлди. Ўша вазиятда кексайиб қолган ота-онам ва ҳали вояга етмаган учта фарзандим қаерда яшайди, деб ўйламадим. Уйни сотувга қўйган пайтимда синглим “Ота-онам кўчада қолишмасин, менда 17 минг АҚШ доллари бор”, деб уйимизни сотиб олди.
Яширмайман, ҳозир уйимиз йўқ. Аёлим болаларим билан бирга қайнотамнинг уйида яшашади.
Бўлиб ўтган шунча воқеалардан кейин ҳам кўзим очилмади. Ўзимга яқин бўлган инсондан янги иш бошлашни айтиб, қарз олдим. Аммо бу пуллар янги бизнесга эмас, онлайн қиморга тикилди. Натижада ундан 27 минг АҚШ доллари қарз бўлиб қолдим. Қарзни беролмаганимдан кейин у шикоят қилишга мажбур бўлди. Агар озодликдан маҳрум этилмаганимда, аллақачон бу қарздан қутулган бўлардим. Аммо шу ерларга келиш пешонамда бор экан. Кўп нарсаларни тушуниб етдим, нафс яхшиликка олиб бормаслигини, нафақат ўша инсоннинг ўзини, балки оила аъзоларининг ҳам ҳаётини зулматга айлантиришини тушуниб етдим. Чунки болаларим анча улғайиб қолишган, айни уларга керак пайтимда ёнларида эмасман. Энг ёмони — улар “отаси қамалган” деган номни эшитишга мажбур.
Озодликка чиқсам, албатта, ўша инсоннинг омонатини қайтараман. Айримлар “Қамалдингиз-ку, қайтаришингиз шартми?” дейишади. Албатта, қайтариш ниятим бор, тун-у кун Аллоҳдан шуни сўрайман.
Қамоқхонада тоза ётоқ жой, кутубхона, иш жойи бор. Аммо ҳеч бир шароит озодликнинг завқини бермайди. Йигитларга маслаҳатим, вақтида нафсни жиловланглар, йўқса, ўзингизни ҳам яқинларингизни ҳам қийнайсиз, дейди маҳкум Дадажон Юсупов.
Изоҳ (0)