АҚШ Миллий хавфсизлик агентлиги катта эҳтимол билан Дания фуқаролари телефон суҳбатлари ва интернет ёзишмаларини кузатган бўлиши мумкин, дея хабар бермоқда «ТАСС».
Бу ҳақда 2009 йилда Нью-Йорк фонд биржаси биносини портлатишни режалаштирган террорчилик гуруҳи аъзолари устидан АҚШда бўлиб ўтган суд чоғида жамоатчиликка ошкор этилган МХА ички ҳужжатлари гувоҳлик бермоқда.
Журналистлар қўлига тушган ушбу ҳужжатларда қайд этилишича, АҚШ махсус хизматлари ислом динига ўтган Дания фуқароси Кеннет Сёренсен кимлар билан алоқа қилганини кузатиш орқали ёвуз ниятлиларни топган. 2013 йилда 30 ёшли даниялик Сурияга бориб, экстремистлар томонида туриб жанг қилган ва ўша ерда ўлдирилган.
МХА ходимлари террорчилар фитнасининг фош қилинишини кўп йиллар давомида улар амалга ошираётган электрон жосуслик дастурининг самарадорлиги сифатида келтирган. Дания учун эса юзага чиққан текширув тафсилотлари янгилик бўлган, чунки бу Скандинавиядаги қироллик МХА жосуслик фаолиятини олиб борган Европа давлатлари қаторига кирганидан дарак берувчи биринчи далилдир.
Дания махсус хизматлари ҳозирча ушбу маълумотга изоҳ беришдан бош тортмоқда. Бироқ мухолифатчи сиёсатчилар адлия вазирига мурожаат қилиб, вазиятга ойдинлик киритишни сўради.
Изоҳ (0)