АҚШ Эронни Американинг йирик банкларига киберҳужумлар уюштиришда айблади

АҚШ адлия вазирлиги эронлик хакерларни Американинг бир нечта банклари сайтларига ва Нью-Йорк яқинидаги дамбанинг компьютер тизимига ҳужумлар кетма-кетлигини уюштиришда айблади, деб ёзади «РБК». Вашингтон даъво қилишича, хакерлар бевосита Теҳрон раҳбарлигида ишлаган.

«Биз компьютер хавфсизлиги билан шуғулланиб, Эрон ҳукумати, жумладан, Ислом инқилоби посбонлари корпуси раҳбарлигида ишлайдиган компаниялар томонидан ёлланган етти нафар тажрибали хакерларга қарши айблов актини эълон қилдик», — дея аниқлик киритди адлия вазирлиги.

Washington Post ёзишича, ушбу хакерлар 2011—2013 йилларда BofA, Sun Trust, PNC, AT&T, Capital One, шунингдек, Нью-Йорк фонд биржаси ва Nasdaq биржасига давомий DDoS ҳужумларни уюштирган. Натижада юз минглаб мижозлар ўз ҳисобларига онлайн тарзда кира олмай қолган, бу ўнлаб миллион доллар зарар келтирган.

Фигурантлардан ҳеч бири ҳибсга олинмаган, уларнинг барчаси ҳозирда Эронда. Шунга қарамай, Вашингтон уларни қонун бўйича таъқиб этмоқчи.