Европа Лигаси доирасида “Аякс”га қарши ўйинда ўз жамоасини қўллаб-қувватлаш учун Амстердамга келган “Маккаби Тель Авив” футбол жамоаси мухлислари дўппосланди. Бу ҳақда Ynet хабар берди.
Исроил Ташқи ишлар вазирлигига кўра, камида 10 нафар исроиллик жароҳат олган. Фуқароларга вазият барқарорлашгунча меҳмонхоналардан чиқмаслик тавсия этилган. Жабрланганлар ҳужум қилган шахслар “Фаластинга озодлик!” шиорларини баралла айтганини таъкидлаган.
“Аякс” футбол клуби “Маккаби”ни 5:0 ҳисобида мағлубиятга учратган ўйиндан сўнг полиция яҳудийларга ҳужум ҳақида маълумот олган. Номаълум шахслар исроилликлар тунайдиган меҳмонхоналарга бостириб киришга ҳам уринган.
Исроил оммавий ахборот воситалари ёзишича, бир неча мухлис оғир жароҳат олган, баъзиларининг паспортлари ўғирлаб кетилган. Амстердам полицияси безориликда иштирок этган ўнлаб шахсларни қўлга олган.
Зўравонлик тўлқинига жавобан Исроил бош вазири Биньямин Нетаньяху Нидерландия ҳуқуқни муҳофаза қилиш органларини исроилликларни ҳимоя қилиш бўйича тезкор ва қатъий чоралар кўришга чақирган. Исроил фуқароларини Амстердамдан эвакуация қилиш учун иккита самолёт жўнатган.
Изоҳ (0)