Дунё ва ўзбек спортига оид 18 октябрь кунининг энг муҳим хабарлари дайжести билан танишинг.
Ўзбекистон
Ёш самбочилар Жаҳон чемпионатида иккинчи ўринни эгаллади
Самбо бўйича Ўзбекистон ёшлар ва ўсмирлар терма жамоаси 15—17 октябрь кунлари Грециянинг Салоники шаҳрида бўлиб ўтган Жаҳон чемпионатида умумжамоа ҳисобида иккинчи ўринни олди. Биринчи поғонадан Россия терма жамоаси жой олган бўлса, кучли учликка Украина вакиллари якун ясаб берди, деб ёзмоқда Миллий олимпия қўмитаси матбуот хизмати.
Шу тариқа ўзбек самбочилари илк маротаба Жаҳон чемпионатида умумжамоа ҳисобида иккинчи ўринни эгаллади. Бунгача самбочиларнинг бундай Жаҳон чемпионатидаги энг яхши натижаси учинчи поғона бўлганди.
Терма жамоа жаҳон биринчилиги якунига кўра 6 та олтин, 3 та кумуш ва 8 та бронза, умумий ҳисобда 17 та медал қўлга киритди.
Бухорода бокс бўйича ёшлар ўртасида Ўзбекистон чемпионати ўтказилди
Бухоро шаҳрида 10—16 октябрь кунлари бокс бўйича ёшлар ўртасида Ўзбекистон чемпионати ўтказилди. Мусобақада мамлакатнинг барча ҳудудларидан жами 362 нафар боксчи совринли ўринлар учун кураш олиб борди.
Мусобақада умумжамоа ҳисобида мезбон Бухоро вилояти вакиллари 1-ўринни эгаллади. Улар 4 та олтин, 2 тадан кумуш ва бронза медалга сазовор бўлди. Кейинги ўринларни Андижон ва Қорақалпоғистон Республикаси терма жамоалари эгаллади.
U-23 Осиё чемпионати саралаши доирасидаги ўйинлар Тошкентда ўтказилади
23 ёшгача бўлган футболчилар ўртасидаги Осиё чемпионати саралаш босқичи доирасидаги D гуруҳи ўйинлари Тошкентда ўтказилиши маълум бўлди.
Кувайт футбол ассоциацияси саралаш босқичи доирасидаги ўйинларни қабул қилишни рад этгач, ушбу ўйинлар Тошкентда ўтказиладиган бўлган, дастлабки ўйинлар 27 октябрь куни бўлиб ўтади.
Маълумот учун, D гуруҳидан Саудия Арабистони, Бангладеш ва Ўзбекистон ўрин олган.
Жаҳон
«Ньюкасл»ни бошқаришга асосий номзодлар аниқланди
Саудия Арабистони фонди томонидан сотиб олинган «Ньюкасл» янги бош мураббий қидиришда давом этмоқда.
The Times нашрининг ёзишича, ушбу лавозимга асосий номзод сифатида «Рейнжерс»ни бошқариб бораётган Стивен Жеррард, Бельгия терма жамоаси бош мураббийи Роберто Мартинес ва «Вильярреал» устози Унаи Эмери кўрилмоқда.
Қайд этилишича, клуб раҳбарияти ушбу ҳафтада янги мураббий масаласида иш олиб боради.
Неймар ва яна жамоанинг икки етакчиси «ПСЖ»нинг «Лейпциг»га қарши ўйинини ўтказиб юборади
«ПСЖ» футболчилари Неймар, Леандро Паредес ва Серхио Рамос жароҳатлар туфайли жамоанинг яқин орадаги ўйинларини ўтказиб юборади.
Клуб матбуот хизматининг маълум қилишича, Неймар Бразилия терма жамоаси йиғинидан сон мушакларидаги оғриқ билан қайтган. Унинг тикланишига бир неча кун кетади ва футболчи Чемпионлар Лигаси доирасидаги «Лейпциг»га қарши баҳсни ўтказиб юборади. Шунингдек, аргентиналик Паредес ҳам терма жамоа сафида жароҳат олган, «ПСЖ»да ҳали дебют қилмаган Рамос эса ҳамон жароҳатидан тикланиш жараёнини бошдан кечирмоқда.
«ПСЖ» — «Лейпциг» учрашуви 19 октябрдан 20 октябрга ўтар кечаси соат 00:00 да бошланади.
«ПСЖ» Серхио Агуэрога қизиқмоқда
«ПСЖ» «Барселона» ҳужумчиси Серхио Агуэрони сотиб олмоқчи.
El Nacional’га кўра, Париж клуби 33 ёшли аргентиналик учун Мауро Икардини таклиф қилишга тайёрлигини маълум қилган. Бироқ манба «Барселона»нинг бу келишувга қизиқиш билдирмаётганини қўшимча қилган.
Қайд этиш керак, Агуэро ёзда Лионель Месси билан бирга тўп суриш учун «Барселона»га ўтганди, бироқ Месси «ПСЖ»га йўл олди. Агар Серхио Париж клубига ўтса, яна Месси билан бир жамоада тўп суриш имкониятига эга бўлади.
Де Брюйне «Олтин тўп»ни Левандовскига беришни таклиф қилди
«Манчестер Сити» ярим ҳимоячиси Кевин де Брюйне «Олтин тўп»ни ким олиши кераклиги ҳақида ўз фикрлари билан ўртоқлашди.
«Агар танлашим керак бўлса, охирги икки йилга қараб қарор қабул қилардим.
Роберт Левандовскини танлаган бўлардим, чунки у ‘Бавария’ сафида жуда кўп гол урди ва қатор совринларни қўлга киритди», — дейди де Брюйне.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)