Ўзбекистон миллий терма жамоасининг собиқ футболчиси Николай Ширшов 28 декабрь куни 47 ёшида вафот этди. Ширшовни ўрта ёшдаги футбол мухлислари яхши эслайди. У Ўзбекистон миллий терма жамоаси таркибида тўп сурган пайтлари чап қанотнинг ҳақиқий қироли эди. Ширшовнинг чап оёқда берадиган кучли зарбалари ҳар қандай моҳир дарвозабонни қийин аҳволга солиб қўярди.
«Дарё» Ўзбекистон терма жамоаси собиқ футболчисининг энг ёрқин ўйинлари ва голларини ёдга олди.
ЖЧ—1998 саралаши, 2-босқич. 1997 йил 27 сентябрь
Ўзбекистон — БАА 2:3
Бу ўйин Ўзбекистон миллий терма жамоаси учун жуда муҳим учрашув эди. Илк бор Жаҳон Чемпионати саралашида қатнашаётган Ўзбекистон саралашнинг биринчи босқичидан осонлик билан ўтди. Аммо иккинчи босқичда Япония, Жанубий Корея каби Осиё грандларига имкониятни бой берди. Шунингдек, қўшни Қозоғистон билан дуранг ўйнади. Бу учта ўйин сафарда ўтказилган эди. БААга қарши баҳс 2-саралаш босқичининг Ўзбекистонда ўтган дастлабки учрашуви бўлди. Ўшанда «Пахтакор» стадиони мухлислар билан тўлиб-тошган. Барча терма жамоадан чиройли ўйин ва ғалаба кутаётганди.
Жароҳатидан тузалиб, сафга қайтган Миржалол Қосимовнинг асосий таркибда ўйинни бошлаши ҳам мухлисларга қўшимча ишонч бахш этганди. Миллий терма жамоа ўйинни ажойиб бошлади. Николай Ширшов 10-дақиқада чап оёқда йўллаган кучли зарбаси билан ҳисобни очди. «Пахтакор» стадиони «портлади». 37-дақиқада ўзбекистонликлар пенальти ишлади. Миржалол Қосимов 11-метрлик нуқтага яқинлашди ва имкониятни кўкка совурган ҳолда «Роберто Баджо издошлари клуби»га қўшилди. Шундан сўнг Ўзбекистондан омад юз ўгирди. Шуҳрат Мақсудовнинг четлатилиши, иккинчи бўлимда 3 та гол ўтказиб юборилиши, аламли мағлубият ва йўқотилган қимматли 3 очко. Ўйин терма жамоа учун муваффақиятсиз якунланган бўлса ҳам Николай Ширшов уни яхши ўтказганди. Унинг чиройли голи ўшанда миллионлаб футбол мухлисларига қувонч ва умид бахш этганди.
ЖЧ—2002 саралаши, 1-босқич. 2001 йил 27 апрель
Ўзбекистон — Иордания 2:2
ЖЧ—2002 саралашида Ўзбекистон миллий терма жамоаси 1-босқичдаёқ муаммога дуч келди. Бу «муаммо»нинг номи Иордания эди (кейинчалик бу терма жамоа бизга энг ноқулай рақиб бўлишини ўшанда ҳеч ким билмасди). Иордания билан сафарда кечган ўйиннинг 1-бўлимидаёқ Ўзбекистон бир йўла иккита гол ўтказиб юборди. Вазият жиддий, ҳеч ким бу рақибдан бундай ўйин кутмаганди. Иккинчи бўлимда Ўзбекистон футболчилар вазиятни ўнглашга ҳаракат қилди ва буни қисман уддалади ҳам. Бунда Николай Ширшовнинг ҳиссаси катта бўлди. Дастлаб, 53-дақиқада Владимир Маминов пенальтидан ҳисобни қисқартирди. Кейин эса 65-дақиқада Николай Ширшов ўзининг севимли чап оёғида зарба йўллаб, ҳисобни тенглаштирди.Ўзбекистон мағлубиятдан қутулиб қолди. Сафардан ҳеч йўғи 1 очко билан қайтилди.ЖЧ—2002 саралаши, 2-босқич. 2001 йил 19 октябрь
Ўзбекистон — Хитой 1:0
ЖЧ—2002 саралашининг сўнгги босқичида Ўзбекистон қийналди. Хитой гуруҳнинг яққол фаворити сифатида намоён бўлиб, мундиалга тўғридан-тўғри йўлланмани қўлга киритди. Аммо Тошкентда кечган баҳсда Ўзбекистон миллий терма жамоаси ана шу гуруҳ фаворити бўлган Хитойни енгишга муваффақ бўлганди. Ягона голни ўшанда Николай Ширшов ўз услубида — чап оёқдаги кучли зарбаси эвазига киритганди. Ўшанда футболчилар параллел равишда кечаётган гуруҳдаги яна бир ўйин: БАА – Уммон учрашуви натижасини ҳали билмасди. Шу сабабли Хитой устидан қозониладиган ғалаба ўтиш ўйинларига йўлланма беради деб ҳисоблаб, Ширшовнинг голидан кейин роса қувонганди. Айниқса, Николайнинг ўзи трибуна панжарасига чиқиб олиб, голни томошабинлар билан бирга ёш болалардек нишонлагани кўпчилик мухлисларнинг ёдида бўлса керак. Аммо Ўзбекистон ўшанда гуруҳда 3-ўринни олиб, ЖЧ билан хайрлашди.
Николай Ширшов Ўзбекистон миллий терма жамоасида жуда чиройли ўйинлар ўтказган бўлса ҳам, у иштирок этган учрашувларнинг аксарида терма жамоага омад кулиб боқмаган. Ширшов ҳам кўплаб ўзбекистонлик футболчилар қаторида мундиал армони билан яшаб, футболдан кетди. Бугун эса бу ёруғ оламни ҳам тарк этди.
Унинг миллий терма жамоадаги статистикаси қуйидагича бўлди:
- Ўйинлар сони — 63 та
- Тўлиқ ўтказган ўйинлар сони — 41 та
- Голлар сони — 13 та
- Сариқ карточка — 16 та
Ёқубжон Бобожонов тайёрлади
Изоҳ (0)