Жиззахда йўл патруль хизмати ходимига қаршилик қилиб, унга тан жароҳати етказган фуқарога нисбатан суд ҳукми ўқилди, дея хабар бермоқда ЙҲХББ.
Маълум қилинишича, 2020 йил 11 август куни Шароф Рашидов тумани ҳудудидан ўтган М-39 Тошкент—Термиз автомагистрал йўлининг 983-километрида «Саёҳат» чойхонаси атрофида «ВАЗ-21063» ва Nexia-3 русумли автомашина ўртасида йўл транспорт ҳодисаси содир этилган. Ҳолат бўйича чақирувга асосан хизмат вазифасини бажариш мақсадида вилоят ИИБ ЙҲХБ 3-сафарбарлик гуруҳи ЙПХ инспектори Комил Бўриев воқеа жойга етиб борган.
Шундан сўнг вилоят ИИБ ЙҲХБ ходими Бўриев содир этилган йўл транспорт ҳодисаси бўйича ҳолатга аниқлик киритиш мақсадида Nexia-3 русумли, 10 J 371 SА давлат белгили автомашина ҳайдовчиси Ж.С.дан автомашина ҳужжатларини тақдим этишини сўраганида, ушбу автомашина йўловчиси бўлган судланувчи Обид Олимов (фамилия ва исми ўзгартирилган) уларнинг суҳбатига асоссиз аралашган.
Кейин Обид Олимов ИИБ ЙҲХБ ходими Комил Бўриевга автомашина ҳужжатларни беришни рад қилиб, воқеа жойидан кетишга уринган вақтда автомашина ҳайдовчи ўриндиғига ўтирган ИИБ ЙҲХБ ходими Бўриевга фаол қаршилик кўрсатиб, унинг хизмат кийимида бўлган бодикамерасини ҳамда кўкрак нишонини тортиб олиб, хизмат кийимининг чап елка погонини юлиб ташлаб, тугмаларини йиртиб, қўли билан ўнг қулоқ, ўнг юз юқори қисмига ва ўнг пастки жағ қисмига, чап елка ўрта қисми, кўкрак қафасига урган ва «соғлиғининг бузилишига олиб келмаган енгил тан жароҳати етказган.
Суд Обид Олимовга жазо тайинлашда айбига тўлиқ иқрорлигини, қилмишидан пушаймонлигини, қарамоғида 4 нафар вояга етмаган фарзанди борлигини, оиласида ягона боқувчилигини, жабрланувчига етказилган зарарни ўз ихтиёри билан тўлиқ қоплаганлигини инобатга олиб, уни Жиноят кодексининг 219-моддасининг 1-қисмида (ҳокимият вакилига ёки фуқаровий бурчини бажараётган шахсга қаршилик кўрсатиш) назарда тутилган жиноятни содир қилганликда айбли деб топган.
Айбланувчига нисбатан шу модда билан иш ҳақининг 10 фоизини давлат даромадига ушлаб қолган ҳолда 1 йил ахлоқ тузатиш ишлари жазоси тайинланган.
Аввалроқ Тошкентда ЙПХ ходимини калтаклаган икки судья лавозимидан олингани, уларнинг шеригига ҳайфсан берилгани, Самарқандда хизмат ўтаётган 31 ёшли ИИБ профилактика инспектори Damas уриб кетиши оқибатида вафот этгани ҳамда Оққўрғонда ЙПХ ходимининг погонини ва камерасини юлиб олган 3 йўловчи 15 суткага қамалгани ҳақида хабар берилганди.
Изоҳ (0)