Тошкент шаҳар ИИББ ижтимоий тармоқларда собиқ депутат Қобил Дусовнинг ЙПХ ходимлари билан жанжаллашгани акс этган видео бўйича маълумот берди.
Ижтимоий тармоқларда тарқалган видеода Қобил Дусов ЙПХ ходимларининг талабларига бўйсунмай, жанжал кўтаргани тасвирланган.
Маълумотларга кўра, 26 январь куни соат 23:30 да ЙПХ инспектори сержант Ж.Тўрабоев Яшнобод туманидаги Мирзо Улуғбек ва Султонали Машҳадий кўчалари кесишмасида хизмат олиб бориши давомида жезл ва ҳуштак билан Captiva русумли автомобиль ҳайдовчисига тўхташ ҳақида ишора берган. Аммо ҳайдовчи ички ишлар ходимининг қонуний талабини менсимасдан ҳаракатни давом эттирган.
Автомобиль кўп ўтмай Мирзо Улуғбек ва Махтумқули кўчалари кесишмасида тўхтатилган. Автомобилни бошқариб борган 36 ёшли Тошкент вилоятида истиқомат қилувчи Қобил Дусов инспекторга транспорт воситасини бошқариш ҳуқуқини берувчи ҳужжатларни тақдим қила олмаган. Йўловчи сифатида автомобилда транспорт воситаси эгаси — 42 ёшли Феруза Б. ҳам бўлган. Ҳайдовчи ва йўловчи ЙҲХБ ЙПХ инспекторлари билан жанжал бошлаб, ўз хизмат фаолияти ва эгаллаб турган лавозимларидан келиб чиққан ҳолда уларга нисбатан қонуний чора кўрмасликни талаб қилган.
Мулоқот давомида йўл-патруль хизмати ҳайдовчи спиртли ичимлик таъсири остида эканлигидан шубҳаланиб, уни экспертизага боришни таклиф қилган. Ҳайдовчи аввал бош тортиб, кейин текширувдан ўтишга рози бўлган. Алкотестор ҳайдовчи томонидан чиқарилган нафасда 0,660 мг/л алкоголь концентрацияси борлигини аниқлаган.
Қобил Дусовга нисбатан Маъмурий жавобгарлик тўғрисидаги кодекснинг 131-моддаси биринчи қисми (транспорт воситаларини маст ҳолда бошқариш) бўйича маъмурий баённома расмийлаштирилди. Феруза Б.га нисбатан эса Маъмурий жавобгарлик тўғрисидаги кодекснинг 131-моддаси учинчи қисми (алкоголли ичимликдан, гиёҳванд модда таъсиридан ёки ўзгача тарзда маст шахсга транспорт воситасини бошқаришни топшириш) бўйича маъмурий баённома расмийлаштирилган.
Маълумот учун, ижтимоий тармоқлардаги чиқишлари билан кўпчиликка таниш собиқ депутат Қобил Дусов 2020 йилнинг 24 июнида интернетдаги саҳифаси орқали халқ таълим тизимини танқид қилган эди. У ўз видеомурожаатида аттестация тизимининг коррупцияга ботганлиги, мактаблардаги шароитларнинг ёмонлиги, ўқитувчилар ойлиги пастлиги ҳамда тизимнинг оғир аҳволи ҳақида гапирганди.
Мазкур видеомурожаат туфайли Халқ таълими вазирлиги Қобил Дусов устидан фуқаролик ишлари бўйича Чирчиқ туманлараро судига даъво аризаси киритганди. Унда Дусовнинг танқидий видеомурожаати орқали вазирликнинг шаъни, қадр-қиммати ва ишчанлик обрўсига путур етказувчи маълумотлар тарқатгани айтилади.
Шундан сўнг Дусов ва вазирлик ўртасида бир неча маротаба суд мажлиси бўлиб ўтди. 23 сентябрь куни ўтказилган суд мажлисида судья Қобил Дусовнинг видеомурожаатида айтган сўзлари устидан суд-лингвистик экспертизаси тайинлаш ва уни ўтказишни Чирчиқ давлат педагогика институти зиммасига юклаш тўғрисида ажрим чиқарди. Ноябрь ўрталарида якунланган суд жараёнларида суд собиқ депутат Қобил Дусов Халқ таълими вазирлигидан узр сўраши кераклиги ҳақида қарор қабул қилди.
Изоҳ (0)