Бухоро вилоятининг Ғиждувон туманидаги «Буктарой» маҳалла фуқаролар йиғинида яшовчи фуқаро 80 ёшли кекса қўшнисини дўппослагани учун жавобгарликка тортилди. Бу ҳақда «Дарё»га Жиноят ишлари бўйича Ғиждувон туман суди судьяси маълум қилди.
Жанжал кекса отахоннинг гулзорига тўп тепиб киритавериб, уни поймол қилган 8 яшар боланинг хатти-ҳаракатларидан бошланган. Бола кекса отахон томонидан бир неча маротаба огоҳлантирилган, аммо бола тартибга келиш ўрнига уни масхаралаб қочган», — дейди судья Бобораҳим Очилов.Суд ҳужжатларида қайд этилишича, 8 яшар Д.Х. кўчада қўшни болалар билан копток ўйнаб, тўпни отахоннинг гулзорига ўтказиб юборган. Қариянинг огоҳлантиришига қарамай, бола шўхлик қилиб, отахонни масхаралаб, тўп тепиб, гулзорга киритишда давом этган. Бундан жаҳли чиққан 80 ёшли қария эса болани ножўя сўзлар билан ҳақоратлаган. Бола эса уйига кириб, отаси Д.М.га қўшни чол уни ҳақоратлаганини айтган. Ота эса бақир-чақир қилиб, қариянинг ҳовлисига бостириб кирган. Ва отахоннинг кўзига, юзига муштлаб уриб, тан жароҳати етказган. Воқеага гувоҳ бўлган қўшни хотин қўшниларни ёрдамга чақирган. Бироздан сўнг воқеа жойига тез тиббий ёрдам ходимлари ҳамда профилактика инспектори етиб келган.
Кекса отахон бир неча кун туман шифохонасида ётиб даволанган. Сўнг отахоннинг кўзи Тошкент шаҳрида жарроҳлик йўли билан операция қилинган. Айбдор эса орадан шунча вақт ўтишига қарамай, қария ҳолидан хабар олмаган ва айбига иқрорлик билдирмаган. Қўшнилар ва гувоҳлар иштирокида Д.М.нинг нотўғри хатти-ҳаракати ўз тасдиғини топган.
Зўравон қўшни судда айбдор деб топилиб, унга нисбатан 6 ой муддатга озодликдан маҳрум қилиш жазоси тайинланган.
Айбдор тайинланган жазони манзил тартибли колонияларда ўтайди. Аммо унинг жазони ўташи қариянинг саломатлигини тиклашга сарфланган харажатлари қопламайди дегани эмас. Жиноят оқибатида етказилган зарар айбдор томонидан тўлиқ қопланади», — дейди Бобораҳим Очилов.
Изоҳ (0)