Жиноят ишлари бўйича Андижон шаҳар суди томонидан акасининг ишлаган пулини талаб қилиб, қурувчи билан жанжаллашиши оқибатида унинг шеригини пичоқлаган йигитга суд ҳукми ўқилди. Бу ҳақда «Дарё»га Андижон вилоят суди ахборот хизмати хабар бермоқда.
Аниқланишича, судланувчи С.У. 2021 йилнинг 20 ноябрь куни соат 16:30 ларда Андижон шаҳрида А.Э. билан Matiz автомашинаси ичида ўзаро пул олди-берди масаласида келиша олмасдан жанжаллашиб кетган. Шу пайтда уларни кўрган Б.Й. ажратиш мақсадида ердан тош олиб, С.У.ни урмоқчи бўлиб, ташланган вақтида қўлида бўлган пичоғи билан унинг қорин қисмига бир маротаба санчиб олиб, оғир тан жароҳати етказган.
«2021 йилнинг октябрь ойида Нусрат билан Рустамнинг хонадонида бирга ишладик. Лекин Нусрат ўн уч кундан кейин, иш тугамасидан Россия кетиб қолди. Иш ҳақини ҳисоб-китоб қилганимизда унга 1 миллион 360 минг сўм беришимиз керак бўлган. Ўша пайтда уй эгасидан сўраганимизда қурилишни тугатганимиздан кейин беришини айтди.
Шунда Нусратга пулни олишим билан оиласига етказиб беришга ваъда қилдим. Бироқ ҳеч қанча ўтмасдан, аввал Нусратнинг турмуш ўртоғи, кейин укаси қўнғироқ қилиб, пулларни беришни талаб қила бошлашди. Ҳолатни ётиғи билан тушунтирсам ҳам, тушунишни исташмади. Шунда укаси Сардорга қурилиш бўлаётган жойга олиб бориб келишим мумкинлигини айтганимда у айтилган манзилга Matiz’да келди.
Унинг автомашинасига чиқиб, йўлда кетаётганимизда ўзаро жанжаллашиб, тортишиб кетдик. У бўғишни бошлаганида мен ҳам унга жавобан бўйнидан бўғдим. Шунда ҳайдовчи машинани четга олиб тўхтатди. Ёнимизда ўтирган Баҳодир эса бизни ажратиш мақсадида ўртага тушганида Сардор унга аралашмаслигини айтиб, қўлидаги пичоқ билан қорнига бир маротаба санчиб олди. Баҳодир ўзини ҳимоя қилиш учун ердан ғишт бўлагини олиб, унга отди, лекин тегмади. Оқаётган қонни кўриб, Сардор у ердан қочиб кетди.
Ҳайдовчи иккаламиз Баҳодирни автомашинага чиқариб, вилоят шошилинч ёрдам касалхонасига олиб бордик. Бор гап шу», — дейди гувоҳ Авазбек.
Мазкур ишни кўриб чиққан судья Камолиддин Шаҳобуддинов айбланувчи С.У.ни Жиноят кодексининг 104-моддаси 3-қисми «б» (қасддан баданга оғир шикаст етказиб одам ўлдириш) бандида назарда тутилган жиноятни содир этганликда айбли деб топиб, унга нисбатан беш йил муддатга озодликдан маҳрум қилиш жазоси тайинлаган.
Изоҳ (0)