Rossiya armiyasi 19-sentyabr kuni Ukrainaning Sumi shahridagi 200 dan ortiq qariya yashaydigan pansionatga zarba berdi. Bu haqda 24 Kanal ma’lum qildi.
Hodisa oqibatida 13 kishi jarohatlangan, kamida bir kishi halok bo‘lgan, 147 kishi xavfsiz joyga ko‘chirilgan. Qurbonlar haqida hozircha ma’lumot mavjud emas.
Hujum vaqtida muassasada 221 nafar bemor bo‘lgan, ulardan 87 nafari to‘shakka mixlangandi, deyiladi xabarda.
Bundan tashqari, 60 nafar xizmat ko‘rsatuvchi xodim, ya’ni jami 300 ga yaqin kishi bo‘lgan. Ular tushlik qilayotganida, ayrimlari dam olayotganida pansionatga zarba berilgan.
“Zarba eng yuqori qavatlarga tushgan, beshinchi qavatda 24 kishi bor edi”, deydi muassasa xodimlari. Eng ko‘p jarohatlanish holati odamlar gavjum bo‘lgan joyda kuzatilgan.
Qutqaruvchilarning qayd etishicha, mahalliy vaqt bilan soat 18:00 holatiga ko‘ra, binodan 147 kishi evakuatsiya qilingan. O‘shanda vayronalar ostidagi odamlar haqida ma’lumot bo‘lmagan, biroq kechki murojaatida Zelenskiy bu ma’lumotlar tekshirilayotganini aytgan. Pansionat binosining tomi, yuqori qavatlari, deraza va eshiklari qisman vayron bo‘lgan.
Zelenskiy munosabati
Rossiya pansionat harbiy baza va harbiy nishon emasligidan bexabar qolishi mumkin emasdi. Birgina shu kunning o‘zida, hozirgacha, Rossiya kuchlari shaharlarimiz va Ukraina pozitsiyalarini nishonga olgan holda 90 ga yaqin boshqariladigan aviabombalaridan foydalandi. Bu terror uchun Rossiya armiyasiga albatta javob beramiz. Sezilarli tarzda, deya munosabat bildirdi Ukraina prezidenti Vladimir Zelenskiy.
Izoh (0)