Россия ташқи ишлар вазири Сергей Лавров 2024 йил декабрь ойида Европада Хавфсизлик ва Ҳамкорлик Ташкилоти (ЙХҲТ) ТИВ кенгаши мажлисида иштирок этиш учун Малтага боришни режалаштирмоқда.
“Лавров Украинада махсус операция бошланганидан бери биринчи марта Европа Иттифоқига аъзо бўлган давлатга ташриф буюради” деб таъкидлайди Ведомости нашри.
Россия ТИВ вакили Мария Захарованинг таъкидлашича, “ушбу тадбирга мезбонлик қилаётган давлат барча аъзо мамлакатларга ишлаш имкониятини бериши керак”.
Малтанинг Россиядаги элчихонаси ЙХҲТ Вазирлар кенгаши йиғилишини 5-6 декабрь кунлари ушбу мамлакатда ўтказиш тўғрисидаги қарор “барча аъзоларга, шу жумладан Россияга ҳам тегишли”лигини тасдиқлаган. Малта элчихонаси Европа Иттифоқи томонидан Сергей Лавровга нисбатан жорий қилинган санкциялар билан боғлиқ вазиятга изоҳ бермаган.
Сергей Лавров Европа Иттифоқига охирги марта Россия-Украина уруши бошланишидан олдин – 2021 йил декабрида ташриф буюрган эди. Ўшанда ЙХҲТ Вазирлар кенгаши йиғилиши Швеция пойтахти Стокгольмда бўлиб ўтган. 2022 йил февраль ойидан бошлаб Лавров Европа Иттифоқининг шахсий санкцияларига дучор бўлган, хусусан, унинг ЕИдаги активларини музлатилган.
2023 йил февраль ойи бошида Австрия ТИВ раҳбари Александр Шалленберг мамлакат парламентида сўзлаган нутқида ЙХҲТ тадбирларидаги россиялик вакиллар санкцияга дучор бўлган тақдирда ҳам кириш ҳуқуқига эгалигини айтган.
2023 йил ноябрь ойида Лавров Европа Иттифоқига аъзо бўлмаган, аммо НАТО таркибига кирувчи Шимолий Македонияда ЙХҲТга аъзо давлатлар ташқи ишлар вазирликлари раҳбарларининг йиғилишида иштирок этган эди. Шу сабабли Латвия, Литва, Эстония, Польша ва Украина вакиллари Скопедаги тадбирга келишдан бош тортган.
2022 йилда ЕХҲТга раислик қилган Польша Лавровни Лодзда бўлиб ўтган ЕХҲТ Вазирлар кенгаши йиғилишида иштирок этиши учун мамлакатга киритишдан бош тортган.
Изоҳ (0)