АҚШ Миллий разведка директори Эврил Хейнс рус ҳарбийлари Украинадаги урушда ўқ-дориларни Россия мудофаа саноати ишлаб чиқараётганига нисбатан тезроқ ишлатаётганини айтди. Бу ҳақда NBC News хабар берди.
«Аниқ қиймат ҳақида маълумот бера олмайман. Аммо рус ҳарбийлари урушда ўқ-дориларни жуда тез тугатмоқда, бу жуда ғайриоддий. Россия ҳозирги босқичда урушда ишлатаётган ўқларни мустақил равишда ишлаб чиқаришга қодир эмаслигига ишонамиз. Демак, бу қийин вазифа эканини билдиради», — дейди Хейнс.
АҚШ разведкасининг фикрича, ўқ-дориларни сарфлашнинг бундай даражаси Россия ҳукуматини бошқа давлатлар, жумладан Шимолий Корея ва Эрондан ҳарбий ёрдам сўрашга мажбур қилади.
Пентагон ноябрь ойида Россия қўшинлари Украинадаги уруш пайтида кунига 20 мингтагача артиллерия ўқини ишлатгани ҳақида хабар берганди.
Эврил Хейнс аввалроқ Украинадаги жанговар ҳаракатлар суръати пасайганини маълум қилганди. АҚШ разведкаси Россия ва Украина томонлари қишдан кейинги қарши ҳужумга тайёргарлик кўриш мақсадида захираларни қайта тўлдиришга интилаётганини таъкидлаган.
Изоҳ (0)