Актриса Ева Лонгория “Жон Уик” фильмининг биринчи қисмини суратга олиш ишлари тўхтатилишидан сақлаб қолган. У сёмка бошланишидан 24 соат аввал етишмаётган 6 миллион доллар маблағни инвестиция қилган, шундан сўнггина муаллифлар ишга кириша олган. Бу ҳақда фильм режиссёрлари Чад Стахелски ва Девид Лейтч Business Insider нашрига берган интервьюсида айтиб ўтди, деб ёзади “Правила жизни”.
“Жон Уик” франшизасининг суратга олиш ишлари бошланишига бир ҳафтадан камроқ вақт қолганида, бюджетга 6 миллион доллар етишмаётгани маълум бўлди. Инвесторлардан бири эса ваъда қилинган тўловни ўз вақтида амалга оширмади. Ўша пайтда режиссёрлар ва фильм бош қаҳрамони Киану Ривз шахсий ҳисобидан лойиҳага сармоя киритган, продюсер Бейзил Иваник ўзининг учта шахсий кредит картасини ишлатган.
Фильмни молиялаштириш ишларига CАА компанияси ёрдам берди ва лойиҳани сақлаб қолиш учун сўнгги саъй-ҳаракатлар сифатида актёрларни фильмга сармоя киритишга тарғиб қилди. Шу вақтда актриса Ева Лонгория ёрдамга келди ва лойиҳани бекор қилишдан 24 соат аввал 6 миллион доллар маблағ киритди. Кейинчалик актрисанинг ўзи “Жон Уик”га сармоя киритиш ғояси ҳаётидаги энг тўғри қарор эканлигини айтди. Ҳозирда Лонгория франшиза тушумларидан даромад олишда давом этмоқда.
Фото: Business Insider
Журналистлар ундан “Жон Уик” фильмига киритган сармоясидан қанча даромад олгани ҳақида сўрашганда, юлдуз шундай жавоб берган:
“Биласизми, буни ўзим ҳам аниқ билмайман. Айта олишим мумкинки, сармоядан икки баробар кўп миқдорда даромад олганим аниқ. Мен инвестиция даҳоси бўлмаганман, бу ҳақда ҳеч нарсани билмаганман ва ҳатто юзага келиши мумкин бўлган хавфларни ҳисобламаганман”, деди Лонгория.
Актрисанинг сўзларига кўра, фильм агентларидан бири унга мурожаат қилган ва “Жон Уик”ни ишлаб чиқаришга сармоя киритиш кераклигини айтган.
“Мен кино ишлаб чиқариш қандай тартибда амалга оширилиши ёки вақтинчалик молиялаштириш тизими ҳақида тасаввурга эга эмас эдим. Аммо мен одамларга сармоя киритишни ёқтиришимни билар эдим. Агар кимдир бирор ишининг устаси бўлса ва фаолиятида иштиёқи баланд бўлса, унга албатта пулларимни ишониб топшираман.
Шу сабабли режиссёрлар Чад Стахелски ва Девид Лейтч ўз вазифаларини аъло даражада бажаришди, деб ҳисоблайман. Улар каскадёр ва режиссёрлар сифатида 10 минг соатдан ортиқ ишлади. Мен улардаги катта иштиёқни кўрар эдим ва режиссёрлар сифатли фильм яратишига ишонар эдим”, деди актриса.
Изоҳ (0)