Aktrisa Yeva Longoriya “Jon Uik” filmining birinchi qismini suratga olish ishlari to‘xtatilishidan saqlab qolgan. U syomka boshlanishidan 24 soat avval yetishmayotgan 6 million dollar mablag‘ni investitsiya qilgan, shundan so‘nggina mualliflar ishga kirisha olgan. Bu haqda film rejissyorlari Chad Staxelski va Devid Leytch Business Insider nashriga bergan intervyusida aytib o‘tdi, deb yozadi “Pravila jizni”.
“Jon Uik” franshizasining suratga olish ishlari boshlanishiga bir haftadan kamroq vaqt qolganida, byudjetga 6 million dollar yetishmayotgani ma’lum bo‘ldi. Investorlardan biri esa va’da qilingan to‘lovni o‘z vaqtida amalga oshirmadi. O‘sha paytda rejissyorlar va film bosh qahramoni Kianu Rivz shaxsiy hisobidan loyihaga sarmoya kiritgan, prodyuser Beyzil Ivanik o‘zining uchta shaxsiy kredit kartasini ishlatgan.
Filmni moliyalashtirish ishlariga CAA kompaniyasi yordam berdi va loyihani saqlab qolish uchun so‘nggi sa’y-harakatlar sifatida aktyorlarni filmga sarmoya kiritishga targ‘ib qildi. Shu vaqtda aktrisa Yeva Longoriya yordamga keldi va loyihani bekor qilishdan 24 soat avval 6 million dollar mablag‘ kiritdi. Keyinchalik aktrisaning o‘zi “Jon Uik”ga sarmoya kiritish g‘oyasi hayotidagi eng to‘g‘ri qaror ekanligini aytdi. Hozirda Longoriya franshiza tushumlaridan daromad olishda davom etmoqda.
Foto: Business Insider
Jurnalistlar undan “Jon Uik” filmiga kiritgan sarmoyasidan qancha daromad olgani haqida so‘rashganda, yulduz shunday javob bergan:
“Bilasizmi, buni o‘zim ham aniq bilmayman. Ayta olishim mumkinki, sarmoyadan ikki barobar ko‘p miqdorda daromad olganim aniq. Men investitsiya dahosi bo‘lmaganman, bu haqda hech narsani bilmaganman va hatto yuzaga kelishi mumkin bo‘lgan xavflarni hisoblamaganman”, dedi Longoriya.
Aktrisaning so‘zlariga ko‘ra, film agentlaridan biri unga murojaat qilgan va “Jon Uik”ni ishlab chiqarishga sarmoya kiritish kerakligini aytgan.
“Men kino ishlab chiqarish qanday tartibda amalga oshirilishi yoki vaqtinchalik moliyalashtirish tizimi haqida tasavvurga ega emas edim. Ammo men odamlarga sarmoya kiritishni yoqtirishimni bilar edim. Agar kimdir biror ishining ustasi bo‘lsa va faoliyatida ishtiyoqi baland bo‘lsa, unga albatta pullarimni ishonib topshiraman.
Shu sababli rejissyorlar Chad Staxelski va Devid Leytch o‘z vazifalarini a’lo darajada bajarishdi, deb hisoblayman. Ular kaskadyor va rejissyorlar sifatida 10 ming soatdan ortiq ishladi. Men ulardagi katta ishtiyoqni ko‘rar edim va rejissyorlar sifatli film yaratishiga ishonar edim”, dedi aktrisa.
Izoh (0)