ОАВ учинчи жаҳон уруши бошланиши мумкин бўлган эҳтимолий жойни маълум қилди

АҚШ, Хитой ва Россия ўртасидаги яширин қуролланиш пойгаси космосда учинчи жаҳон уруши бошланишига олиб келиши мумкин. Бу ҳақда Wired журналига таяниб, «РИА Новости» хабар берди.

Таъкидланишича, ҳарбий мансабдорлар аллақачон Ер орбитасини янги «ҳарбий ҳаракатлар майдони» деб аташни бошлаган. АҚШ Миллий разведкасининг собиқ директори Жеймс Клеппер АҚШнинг потенциал душманлари томонидан космик технологияларининг яратилишини мамлакат учун асосий стратегик таҳдидлардан бири деб атаган.

Журнал томонидан ёзилишича, космос бугунги кунда ҳарбий ҳаракатлар ҳудудига ўхшаб қолган. Айни пайтда сайёра атрофида кўп сонли объектлар айланмоқда. Олимларнинг тахмин қилишича, қачондир уларнинг сони Кесслер эффекти деб номланувчи чегарага етади: иккита йирик объектнинг тўқнашиши кўп сонли майда бўлакларнинг пайдо бўлишига олиб келади ва сайёра атрофидаги бўшлиқдан фойдаланиб бўлмай қилади.

Нашрнинг қайд этишича, назарий жиҳатдан АҚШ, Россия ёки Хитойга тегишли космик объектнинг ҳар қандай тасодифий йўқ қилиниши тажовуз ва урушнинг эълон қилиниши сифатида қабул қилиниши мумкин.

Бундан ташқари, «космик етакчилар» космос соҳасида яширин ишланмалар олиб бормоқда, бу эса потенциал душманлар имкониятларини баҳолашни қийинлаштирмоқда ва муносабатлар ёмонлашувига олиб келмоқда.