Хитойнинг Дусзяндаги тадқиқот марказидан иккита катта уч ёшли панда — Бао Ли ва Чин Бао Вашингтондаги миллий ҳайвонот боғига жўнатилди. Бу ҳақда CNN хабар берди.
АҚШ пойтахтида 23 йил давомида яшаган катта пандалар Мей Сян, Тян Тян ва уларнинг боласи Сяо Цисзи 2023 йил ноябрь ойида Хитойга қайтиб келганди. Вашингтонга юборилган пандалар Panda Express деб номланган Boeing 777 махсус самолётида етказилади. Улар учун бамбук, сабзи ва маккажўхори нонлари тайёрлаб қўйилган.
Июнь ойида Хитой 20 йил ичида биринчи марта АҚШга бир жуфт йирик панда юборганди. Бундан бир неча ой олдин Хитой раҳбари Си Цзиньпин пандаларни Хитой ва Америка халқлари ўртасидаги дўстлик элчилари сифатида “Сан Диего” ҳайвонот боғига юборишни таклиф қилганди.
Барча пандалар Хитой мулки ҳисобланиб, ижара шартномалари доирасида бошқа мамлакатларга юборилади. Одатда ҳар бир жонивор учун 250 минг доллардан 1 миллион долларгача тўлов амалга оширилади. Дунёда жами 1,6 минг панда мавжуд бўлиб, улардан 30 тачаси Хитойдан ташқарида яшайди.
Изоҳ (0)