Шавкат Мирзиёев “Халқаро шартномани тасдиқлаш тўғрисида”ги қарорни имзолади.
Унга кўра, 2023 йил 14 сентябрь куни Душанбе шаҳрида Марказий Осиё давлатлари раҳбарларининг навбатдаги Маслаҳат учрашувида имзоланган Марказий Осиёда ерусти транспорти ўзаро боғлиқлигини мустаҳкамлаш тўғрисидаги битим тасдиқланди.
Транспорт вазирлиги ушбу халқаро шартномани амалга ошириш учун масъул бўлган ваколатли орган этиб белгиланди.
Вазирлар Маҳкамаси ҳамда тегишли вазирлик ва идораларнинг раҳбарлари ушбу халқаро шартнома кучга кирганидан кейин белгиланган тартибда унинг қоидалари амалга оширилиши устидан назоратни таъминлайди.
Ҳужжат минтақа мамлакатлари ўртасида транспорт ва логистика соҳасида мустаҳкам алоқаларга эришишга қаратилган.
У, хусусан, қуйидагиларни назарда тутади:
- қуруқликдаги транспортда халқаро ташувни ривожлантириш учун қулай шарт-шароитлар яратиш;
- Марказий Осиёда транспорт хизматлари бозорида рақобат муҳитини таъминлаш;
- самарадорликни ошириш ва янги халқаро, шу жумладан мултимодал коридорларни шакллантириш;
- қуруқлик транспортида ташиш ва транзит жараёнини соддалаштириш;
- замонавий транспорт ва логистика хизматларини ривожлантириш;
- инновацион технологияларни жорий этиш ва улардан фойдаланиш, шу жумладан қуруқликдаги транспортда ташиш жараёнини рақамлаштириш;
- экологик тоза транспорт турларидан фойдаланиш амалиётини рағбатлантириш ва ривожлантириш.
2023 йил 14 сентябрь куни Душанбеда ўтказилган Марказий Осиё давлатлари раҳбарларининг бешинчи Маслаҳат учрашувида транспорт жиҳатидан ўзаро боғлиқлик масалаларига алоҳида эътибор қаратилганди. Асосий ташқи бозорлардан жуғрофий жиҳатдан узоқлигини ҳисобга олганда, мамлакатларда юкларни ташиш учун кетадиган харажатлар улуши товарларнинг сўнгги қийматига нисбатан 50 фоизгача етаётгани айтилганди. Дунёдаги ўртача кўрсаткич 11 фоиздан ошмайди. Натижада иқтисодиёт ривожланган давлатлардагидан кўра 2-3 марта кўп транспорт харажатини кўтаришга мажбур бўлмоқда.
Мамлакатларнинг транспорт соҳасидаги салоҳиятини янада ошириш мақсадида тармоқ вазирлари учрашувлари доирасида Марказий Осиёда Транспорт ва транзит ҳақидаги битимни ишлаб чиқиш, бизнес учун қулай бўлган оралиқ тарифларни қўллаган ҳолда, Хитой, Жанубий Осиё ва Яқин Шарқ ҳамда Европа Иттифоқи мамлакатлари бозорларига чиқиш учун самарали транспорт коридорларини ривожлантириш бўйича аниқ механизмларни шакллантириш таклиф қилинганди.
Изоҳ (0)