Shavkat Mirziyoyev “Xalqaro shartnomani tasdiqlash to‘g‘risida”gi qarorni imzoladi.
Unga ko‘ra, 2023-yil 14-sentyabr kuni Dushanbe shahrida Markaziy Osiyo davlatlari rahbarlarining navbatdagi Maslahat uchrashuvida imzolangan Markaziy Osiyoda yerusti transporti o‘zaro bog‘liqligini mustahkamlash to‘g‘risidagi bitim tasdiqlandi.
Transport vazirligi ushbu xalqaro shartnomani amalga oshirish uchun mas’ul bo‘lgan vakolatli organ etib belgilandi.
Vazirlar Mahkamasi hamda tegishli vazirlik va idoralarning rahbarlari ushbu xalqaro shartnoma kuchga kirganidan keyin belgilangan tartibda uning qoidalari amalga oshirilishi ustidan nazoratni ta’minlaydi.
Hujjat mintaqa mamlakatlari o‘rtasida transport va logistika sohasida mustahkam aloqalarga erishishga qaratilgan.
U, xususan, quyidagilarni nazarda tutadi:
- quruqlikdagi transportda xalqaro tashuvni rivojlantirish uchun qulay shart-sharoitlar yaratish;
- Markaziy Osiyoda transport xizmatlari bozorida raqobat muhitini ta’minlash;
- samaradorlikni oshirish va yangi xalqaro, shu jumladan multimodal koridorlarni shakllantirish;
- quruqlik transportida tashish va tranzit jarayonini soddalashtirish;
- zamonaviy transport va logistika xizmatlarini rivojlantirish;
- innovatsion texnologiyalarni joriy etish va ulardan foydalanish, shu jumladan quruqlikdagi transportda tashish jarayonini raqamlashtirish;
- ekologik toza transport turlaridan foydalanish amaliyotini rag‘batlantirish va rivojlantirish.
2023-yil 14-sentyabr kuni Dushanbeda o‘tkazilgan Markaziy Osiyo davlatlari rahbarlarining beshinchi Maslahat uchrashuvida transport jihatidan o‘zaro bog‘liqlik masalalariga alohida e’tibor qaratilgandi. Asosiy tashqi bozorlardan jug‘rofiy jihatdan uzoqligini hisobga olganda, mamlakatlarda yuklarni tashish uchun ketadigan xarajatlar ulushi tovarlarning so‘nggi qiymatiga nisbatan 50 foizgacha yetayotgani aytilgandi. Dunyodagi o‘rtacha ko‘rsatkich 11 foizdan oshmaydi. Natijada iqtisodiyot rivojlangan davlatlardagidan ko‘ra 2-3 marta ko‘p transport xarajatini ko‘tarishga majbur bo‘lmoqda.
Mamlakatlarning transport sohasidagi salohiyatini yanada oshirish maqsadida tarmoq vazirlari uchrashuvlari doirasida Markaziy Osiyoda Transport va tranzit haqidagi bitimni ishlab chiqish, biznes uchun qulay bo‘lgan oraliq tariflarni qo‘llagan holda, Xitoy, Janubiy Osiyo va Yaqin Sharq hamda Yevropa Ittifoqi mamlakatlari bozorlariga chiqish uchun samarali transport koridorlarini rivojlantirish bo‘yicha aniq mexanizmlarni shakllantirish taklif qilingandi.
Izoh (0)