Тошкентда 26 сентябрь куни хорижлик меъморлар иштирокида урбан-форум бўлиб ўтади.
Мазкур тадбир яқин ва узоқ хориждаги дизайнерлар, меъморлар ва урбанистларни ўзига жалб қиладиган марказга айланади. Спикерлар сафида Қозоғистон, Қирғизистон, Тожикистон шаҳарларидан меъморлар, Британия Қироллик меъморлар институти томонидан тузилган “Амалиётдаги 100 нафар аёл меъмор” рейтингига кирган мутахассислар, етакчи девелоперлик компаниялари, дизайн бюролари ва тегишли йўналишлар талабалари бор.
Форум нима учун керак?
Мақсад — транспорт инфратузилмаси, экологик муаммолар, уй-жой муаммолари, иқтисодий ривожланиш, шаҳарлар келажагини шакллантириш, мулоқот, инновациялар ва аҳоли турмуш сифатини яхшилаш каби масалаларни ва муаммоларни ҳал қилиш бўйича тавсиялар ишлаб чиқиш.
Форумни Ўзбекистон ёш меъморлар бирлашмаси ташкил этмоқда. Ушбу тадбирни ўтказиш орқали Тошкентни урбанистиканинг долзарб муаммолари атрофида экспертлар бирлашмасининг бошланғич нуқтасига айлантириш ғояси бир йилдан ортиқ вақт давомида мутахассислар доирасида фаол муҳокама қилинган, сўнгра ташаббус босқичма-босқич соҳа ривожланиши учун қўшма амалий ҳаракатлар режасига айланган.
“Биз, ёш мутахассислар ҳамжамияти сифатида соҳа муаммоларини шунчаки оммавий ахборот воситалари ва жамоат тадбирларига олиб чиқишни эмас, балки шаҳар муҳитининг бир қисмига айланишни, ҳамжамиятимиз салоҳиятини кўрсатишни ва гендер тенглиги масалалари бўйича ўхшаш қарашли иштирокчиларни бирлаштирмоқчимиз. Соҳада ҳали ҳам мутлақ патриархат ва камситишга оид кўплаб муаммолар мавжуд, шунинг учун бу андозани ўзгартиришимиз муҳим”, деди Ўзбекистон ёш меъморлар бирлашмаси раҳбари, ТатаЛАБ архитектура студияси асосчиси Тахмина Турдиалиева.
Форумда дизайнерлар ва меъморлар томонидан яратилган санъат объектлари, шунингдек, ўз шахсиятини ошкор қилмайдиган энг машҳур рассомнинг махфий асарлари намойиш этилади.
“Бундай форматнинг мақсади жамият муаммоларини акс эттириш, ушбу муаммонинг турли жиҳатларига очиқ минбар бериш ва мулоқот орқали маҳаллий ва Ўзбекистондан ташқаридаги ҳокимият органларига муҳокама учун тақдим этиладиган ечимларни ишлаб чиқишдир. Бизнинг минтақамиз, яъни Марказий Осиёни назарда тутяпман, қардош анъаналар ва маданиятлар билан ҳам, афсуски, урбанизм муаммолари, ҳаво сифати ва дарахтларга зарар етказадиган шаҳарларнинг ҳаддан ташқари тез қурилиши билан ҳам жуда ўхшаш. Биз шаҳарлар учун муҳим бўлган мавзуларни муҳокама қилишдан четда қолмаймиз”, деди Тахмина Турдиалиева.
Мустақил ҳамжамият қарори билан форумда давлат органлари, хусусий сектор ва меъморчилик, қурилиш, экология ҳамда рақамли технологиялар соҳасидаги мутахассисларни очиқ мулоқотда бирлаштириш режалаштирилмоқда.
Кучларни бирлаштириш, айниқса иқлим ўзгариши шароитида, қурилиш ва уй-жой муаммоларини ҳал қилиш масалаларида энг мақбул ечимларни топиш, шунингдек, мамлакат иқтисодиёти учун муҳим бўлган ушбу соҳада қурилиш ва хусусий секторни ривожлантириш бўйича Ўзбекистон давлати, тадбиркорлари ва аҳолисининг табиати ва қонуний манфаатларини ҳимоя қилишни таъминлайдиган меъёрий базани такомиллаштириш бўйича таклифлар тайёрлаш имконини беради.
Урбан-форумда шаҳарга бефарқ бўлмаган ҳар бир киши қатнашиши мумкин.
Изоҳ (0)