Ispaniyaning GQ nashriga bergan yangi intervyusida xonanda Shakira “Barselona” ning sobiq futbolchisi Jerar Pike bilan ajrashgandan keyingi hayoti va nimalarni his qilayotgani haqida so‘zlab berdi.
Intervyuda kolumbiyalik xonanda bunday katta yo‘qotish va dardni yengishga aynan musiqa va qo‘shiq kuylash yordam berganini ta’kidladi.
“Ajrimdan keyin bir necha oy davomida men qayg‘ularimni ichimga yutishga harakat qilib jim qoldim. Ammo musiqa yozishni boshlagach, qayg‘ularni yenga boshladim. Aynan san’atga qaytish mening davolanish usulimga aylandi. Bu bir tekisda davom etmagan bo‘lsa ham menga ancha yengillik berdi”, deya o‘z kechinmalari haqida so‘zlab berdi Shakira.
Shuningdek, xonanda o‘zining ota-onasiga havas qilishi va ular bilan faxrlanishini ta’kidladi:
“Ota-onam munosabatlari chin sevgining haqiqiy namunasidir. Ularning sevgisi har qanday to‘siqlarni yengib o‘tadi. Ota-onam 50 yildan beri birga. Men onamning otamga go‘yo bu dunyoda qolgan oxirgi odamga qaragandek tikilishini ko‘raman. Otam ham onamga xuddi shunday javob beradi. Ular keksa bo‘lishiga qaramay, yosh juftliklardek xushchaqchaq va baxtiyor hayot kechiradi”, deya bo‘lishdi xonanda.
Ajrimdan so‘ng bo‘lib o‘tgan voqealar, jumladan, sud ishlari qiyinchiliklariga qaramay, Shakira ushbu og‘ir davrda uni yaqinlari qo‘llab-quvvatlaganini aytdi. “Menimcha, bu dunyoda sevgi bor, lekin faqat ayrim insonlargagina nasib etadi, bu xuddi VIP klubning bir turiga o‘xshaydi, unga har kim ham kira olmaydi”, deydi Shakira.
Eslatib o‘tamiz, Shakira va Jerar Pike 2010-yilgi futbol bo‘yicha jahon chempionati vaqtida tanishgan. Sobiq sevishganlar bir kunda, 10 yil farq bilan tug‘ilgan. 11 yillik munosabatlardan keyin Pike va Shakiraning ajrashgani 2022-yil iyunda ma’lum bo‘ldi. Ajrimga futbolchining ko‘plab xiyonati sabab bo‘lgani xabar qilingan. Farzandlari Sasha va Milan tug‘ilganiga qaramay, juftlik oilaviy munosabatlarini qonuniylashtirmagan va fuqarolik nikohida yashagan. Ajrimdan so‘ng xonanda bolalarning vasiyligini o‘z zimmasiga olgan.
Izoh (0)