Колумбиялик хонанда Шакира солиқ тўлашдан бўйин товлаш иши бўйича айбдор эканлигини тан олиб, 3 йил шартли муддат ва 7 миллион евро жарима тўлаш жазосига рози бўлди. Хонанда прокуратура билан келишувга эришгач, суд иши тўхтатилган.
Гап шундаки, Испания ҳукумати Шакирани 2012 йилдан 2014 йилгача бўлган вақт мобайнида 14,5 миллион евро миқдоридаги даромад солиғини тўламаганликда айблаган. Шакира айбдор деб топилган ҳолатда 8 йилгача қамоқ жазосини олиши ёки 26 миллион евро жарима тўлаши мумкин эди. Шакира Исабел Муборак Риполл 20 ноябрь куни суд мажлисида шахсан иштирок этиб, айбдор эканлигини тан олган.
Маълумотларга кўра, хонанданинг бундай қадам ташлашига фарзандлари сабабчи бўлган. “Мен бу курашда оналари ўз хотиржамлигини йўқотишини истамаган фарзандларимнинг манфаатларидан келиб чиқиб ушбу масалани тезроқ ҳал қилдим. Ижодий фаолиятим давомида ҳамиша тўғри йўл тутишга ва бошқаларга ижобий намуна кўрсатишга интилганман. Бу молиявий қарорларимга ҳам тегишли, ҳар доим солиқ масаласида дунёнинг энг яхши маслаҳатчиларига мурожаат қилганман. Шунга қарамасдан, Испаниянинг солиқ органлари кўплаб профессионал спортчилар ва бошқа таниқли шахслар қаторида менга нисбатан ҳам иш очишди, йиллар давомида қувват, вақт ва асабларимизни йўқотишга мажбур қилишди.
Қаршимда иккита йўл бор эди: охиригача курашиб, руҳий хотиржамлигим, фарзандларимнинг хотиржамлигини хавф остида қолдириш, қўшиқлар, альбомлар устида ишлаш ва гастролларни тўхтатиш ёки ҳаётимнинг ушбу саҳифасини ёпиб, уни ўтмишда қолдириш”, – дейди ижодкор.
Хонанданинг айтишича, адвокатлар ишни ютиб чиқишларига ишонишган, шунга қарамасдан Шакира қатъий қарор қабул қилиб, беш йилдан буён давом этиб келаётган мавзуга нуқта қўйган.
Изоҳ (0)