Испания ҳукумати хонанда Шакирани солиқларни тўламаганлик айблови билан расмий равишда судга беришга қарор қилди. Esplugues де Llobregat шаҳар суди ушбу маълумотни ҳақиқатан ҳам тасдиқлаган, аммо суд санаси ҳали эълон қилинмаган, деб ёзади «Lady.mail.ru».
Прокуратуранинг фикрича, қўшиқчи 2012—2014 йилларда Испанияда топган даромадидан қироллик ғазнасига 14,5 миллион евро (14 217 757 доллар) кам тўлаган. Ҳуқуқ-тартибот идоралари хонанда учун саккиз йиллик қамоқ жазоси ва 23 миллион евро (22 552 305 доллар) жарима сўрамоқда.
Машҳур хонанданинг юристлари кутилаётган суд жараёни ҳақидаги хабарларга аллақачон изоҳ берган. «Шакирани судга бериш ҳақидаги буйруқ шу каби жараёндаги навбатдаги қадамдир. Вазият ўзгармади, ҳамма нарса одатдагидек давом этмоқда. Барча далиллар ўз вақтида тақдим этилиб, вазифалар бажарилди», — деди унинг адвокати.
Шунингдек, қўшиқчининг адвокати унинг Испанияда йилига 183 кундан ортиқ вақт ўтказганига тўғридан-тўғри далил йўқлигини таъкидламоқда. Бу муддат шахс автоматик равишда қиролликнинг солиқ резиденти бўладиган давр. Хонанда адвокатларининг таъкидлашича, у Испанияга 2015 йилда кўчиб ўтган ва бундан олдин у Багама оролларида солиқ резиденти бўлган. Прокуратуранинг фикрича, 2012 йилнинг май ойида Шакира Испаниядан уй сотиб олиб, уни таъмирлашни бошлаган, шунингдек, овоз ёзиш студиясини бир йилга ижарага олган.
Қўшиқчининг ўзи аввалроқ Испания расмийлари унга қарши сохта айблов қўйганини ва ўзи эса улар билан курашишга ваъда берганини айтган. Унинг таъкидлашича, иш судга ошмасидан олдин Испания солиқ идораси унга тақдим этган суммани тўлаган.
Шакира биринчи марта 2018 йилда солиқ тўлашдан бўйин товлаганликда айбланган ва 25 миллион доллар солиқ тўлаган. Кейинчалик ижрочи апелляцияга берган, бироқ Испания суди уни рад этган.
Изоҳ (0)