Бугунги қаҳрамонларимиз дунёнинг турли чеккаларида ўз мухлисларига эга юлдузлардир. Улар ўз она тилидан ташқари бошқа хорижий тилларда равон сўзлашиш қобилияти билан барчамизга ўрнак бўла олади.
Шакира
Истеъдодли инсон ҳар соҳада маҳоратлидир, деб бежизга айтилмаган. Бунинг яққол намунаси — колумбиялик хонанда Шакира. У олтита тилда сўзлаша олади. Испан ва инглиз тилидан ташқари қўшиқчи араб, португал, француз ҳамда италян тилларини билади.
Инглиз тилини Шакира кечроқ ўрганган. Хонанда қўшиқларида ўз фикри ва ўйларини аудиторияга етказиш ҳамда дунё бўйлаб кўпроқ мухлислар билан мулоқот қилиш мақсадида инглиз тилини ўрганган.
Женнифер Лопес
Актриса ва хонанда Жей Ло эса икки тилда эркин гапиради. Юлдуз Нью-Йоркда туғилиб ўсган ва унинг талаффузи америкача шевага хосдир. Унинг ота-онаси асли Пуэрто-риколик бўлгани сабабли хонанда болалигиданоқ испан тилини ҳам оила даврасида ўрганиб келган. Шунинг учун Лопес испан ва инглиз тилини ўз она тили деб ҳисоблайди.
Интервьюлардан бирида Женнифер испан тилини секин-аста унутиб қўяётгани ҳақида айтган эди. Америкада яшаш ва ишлаш, тўлиқ инглиз тилидаги муҳитда бўлиш ўз таъсирини кўрсатган: ҳозирда хонанда испан тилида тез-тез грамматик хатоларга йўл қўяди ва баъзи сўзларни унутиб қўяди.
Том Ҳиддлстон
Том Ҳиддлстондан интервью олиш журналистлар учун жуда қулай, чунки актёр уларга мулоқот тилини танлаш таклифини беради. Унинг она тили инглиз тилидир. Том испан, француз, грек ва ҳатто лотин тилларини ҳам билади. Юлдуз буларнинг барчаси унга турли хил ролларни ижро этиш учун ёрдам беради, деб таъкидлайди.
“Мактабда янги тилларни ўрганишни бошлаганимда уларни ўрганиш мен учун қулай ва осон эканлигини англадим ва ҳозирда немис тилини ўрганишда давом этмоқдаман”, — дейди актёр.
Шарлиз Терон
Бунга ишониш қийин, аммо актриса Шарлиз Терон Жанубий Африкада дунёга келган. У инглиз ва Африкаанс тилининг 26 хил шевасини билади. Актрисанинг банк ходими билан инглиз ва африкаанс тилида сўзлашаётган кун кинодаги карьерасининг бошланишига сабаб бўлган. Иккита тилда равон гапираётган қизни кўргач, истеъдодларни изловчи агент унга фильмда суратга тушишни таклиф қилган. Актриса тан олишича, атрофдагилар унинг сўзларини тушунмаслиги учун оила аъзолари билан атайлаб африкаанс тилида сўзлашади.
Натали Портман
Актриса ватани Исроил бўлиб, иврит ва инглиз тилидан ташқари япон, немис, француз ва испан тилларида гаплаша олади. Гарвард университетини тамомлаган актриса бир нечта илмий ишларни ёзишни ҳам уддасидан чиққан. Француз тилида ҳам равон сўзлашишига унинг турмуш ўртоғи — франциялик Бенжамин Мильпье сабаб бўлган.
Қизиқарли факт: Натали Портман ўрганган яна бир ноодатий тил — бу имо-ишора билан сўзлашув эди. 2011 йилда у Пол Маккартнининг My Valentine клипида қўшиқ сўзларини имо-ишора билан тасвирлаган.
Изоҳ (0)