Тожикистондаги Роғун ГЭС тўлиқ қувватга эга бўлгандан кейин ишлаб чиқариладиган электр энергиясининг қарийб 70 фоизи Марказий Осиё мамлакатларига экспорт қилинади. Бу борада Ўзбекистон ва Қозоғистон билан меморандумлар имзоланган. Бу ҳақда Тожикистон энергетика ва сув ресурслари вазири Далер Жума Шанхай ҳамкорлик ташкилотига (ШҲТ) аъзо давлатлар энергетика вазирларининг Остонадаги йиғилишида маълум қилди.
“Улкан гидроэнергетика салоҳиятига эга Тожикистон Республикаси қуввати 3780 МВт бўлган Роғун ГЭС қурилишини давом эттирмоқда. Роғун ГЭС нафақат Тожикистон Республикасининг энергия хавфсизлигини таъминлайди, балки қўшни давлатларга экспорт етказиб бериш ҳажмини оширишга ҳам ҳисса қўшади. Шуни таъкидлаш керакки, ишлаб чиқарилган маҳсулот ҳажмининг 70 фоизи минтақа мамлакатларида ўсиб бораётган талабни қоплаш учун экспорт қилинади”, — деди у.
Вазирнинг таъкидлашича, “ҳозирги кунга қадар Тожикистон, Ўзбекистон ва Қозоғистон энергетика тизимлари ўртасида энергетика алоқаларини ривожлантириш бўйича меморандум имзоланган бўлиб, у Роғун ГЭСда ишлаб чиқарилган электр энергиясини экспорт қилишни назарда тутади”.
Шунингдек, вазир республика Марказий Осиё мамлакатларига энергияни экспорт қилиш учун барча саъй-ҳаракатларини амалга оширишига ишонтирди.
Роғун ГЭС Душанбедан 110 км узоқликда Вахш дарёсида жойлашган бўлиб, минтақадаги энг йирик иншоот ҳисобланади. Уни қуриш 1976 йилда бошланган, аммо СССР парчаланганидан сўнг қурилиш тўхтатиб қўйилганди.
Кейинчалик Тожикистон ўз маблағлари ҳисобидан ва халқаро жамғармалар ҳамда ташкилотларнинг маблағларини жалб қилган ҳолда, лойиҳада кўзда тутилган 600 МВт қувватга эга ГЭСларни қуриш бўйича ишларни давом эттирди.
6 та агрегатдан ҳозирча иккитаси ишга туширилди. Учинчиси 2025 йилда ишга туширилиши режалаштирилган. 335 метр баландликдаги гидроэлектр тўғони дунёдаги энг баланд тўғон бўлади. Далер Жуманинг айтишича, ишга туширилган иккита ГЭС агрегати 7 миллиард кВт/соатдан ортиқ электр энергияси ишлаб чиқарган.
Изоҳ (0)