Афғонистоннинг “Толибон” ҳаракати ахлоқ вазирлиги оммавий ахборот воситаларига барча тирик мавжудотлар тасвирини чоп этишни тақиқловчи қонунни амалга оширишга ваъда берди.
Журналистларнинг таъкидлашича, бу қоида босқичма-босқич амалга оширилиши мумкин.
“Қонун бутун Афғонистонга тааллуқлидир ва у босқичма-босқич одамларни тирик мавжудотларнинг тасвирлари ислом қонунларига зид эканлигига ишонтириш орқали амалга оширилади”, дейди AFP’га Эзгуликни тарғиб қилиш ва иллатларнинг олдини олиш вазирлиги вакили Сайфул Ислом Хайбер.
Мазкур қонун ОАВ учун бир қанча қоидаларни, хусусан, барча тирик мавжудотлар тасвирларини чоп этишни ва нашрларга исломни масхара қилиш ёки камситишни тақиқлаш, ислом қонунларига зид келмасликни буюриш кабиларни батафсил санаб ўтган.
“Янги қонун бандлари ҳалигача қатъий бажарилмаган ва “Толибон” расмийлари ижтимоий тармоқларда мунтазам равишда одамларнинг суратларини жойлаштиришда давом этмоқда”, дейилади хабарда.
1996 йилдан 2001 йилгача “Толибон”нинг аввалги ҳукмронлиги даврида бутун мамлакат бўйлаб телевидение ва тирик мавжудотлар тасвири тақиқланган эди, бироқ улар ҳокимиятга қайтганидан бери шунга ўхшаш фармон ҳозиргача кенг кўламда жорий этилмаган.
Изоҳ (0)