“Толибон” ҳукумати мамлакат ғарбидаги Ҳирот шаҳрида Россия нефтини Жанубий Осиёга етказиб беришда фойдаланиладиган транзит марказ қурмоқда. Бу ҳақда Sputnik Афғонистон нашри хабар берди.
Манбада айтилишича, Ҳиротда қурилаётган логистика маркази Россиянинг миллионлаб тонна нефть маҳсулотларини Жанубий Осиё мамлакатларига, хусусан, Покистонга етказиб бериш мақсадида ташкил этилмоқда. Ушбу логистика иншоотининг дастлабки қуввати бир миллион тоннани ташкил этади.
Янгилик ҳақида дастлаб “Толибон” Савдо ва саноат вазирлиги матбуот котиби Абдулсалом Жавад маълум қилган. Транзит маркази 2 ой муддатда якунланиши хабар қилинган.
Логистика маркази уч давлат компаниялари иштирокида ташкил этилиши белгиланган. Кейинчалик савдо ва транзит соҳасига қизиқиш билдирган барча давлатлар ушбу йўналишдан фойдаланиши мумкин.
Расмийлар бу транзит маркази Афғонистон учун савдо ва логистика нуқтаи назаридан жуда муҳим эканини билдирган. Чунки мамлакат ҳудудида ҳали бирор бир актуал халқаро савдо коридори мавжуд эмас.
Бу марказ минтақа давлатлари ва ҳатто Европа учун ҳамкорлик воситаси бўлиши мумкин. Марказ қурилиши учун бюджет ҳали келишилмаган. Бу марказ инфратузилмаси хусусий ва тижорат сектори учун ҳеч қандай тақчиллик яратмаслиги учун Осиё ва Европа даражасидаги барча имкониятлар билан таъминлангани хабар қилинган.
Изоҳ (0)